Sign of the times?

Nagkadaghan ang nakit-an nga mga patay sa nahitabong pagdahili sa yuta sa Naga, Cebu. Hangtod karon, padayon pa gihapon ang gihimo nga rescue operations sa pagtuo nga aduna pay buhi nga nalubong sa maong pagdahili sa yuta.

Apan mao kini ang nakapait – magakadugay, magkagamay usab ang tsansa nga mabangalan pa nga buhi ang mga nalubong sa yuta.

Apan dili sab mabasol ang mga hingtungdan nga maningkamot gyod nga makit-an nga buhi ang ilang mga minahal sa kinabuhi, bisan pa sa nagakagamay nga tsansa nga mabangalan pa sila nga buhi.

Ang uban, midawat na lang ani nga kamatuoran.

Apan bisan pa niini, naglaom gihapon sila nga makita ang lawas sa ilang mga minahal sa kinabuhi aron mapahimutang kini nila sa paglubong.

Kon dili man makit-an nga buhi, at least makit-an sila nga patay.

Aron malubong og klaro.

Angayan gyod nga susihon kon unsay hinungdan sa pagdahili sa maong yuta.

Tungod ba kini sa quarry nga gihimo sa maong lugar?

O, tungod sa uban pa nga mga hinungdan?

Angay lang nga manubag ang mga hingtungdan nga mga opisyal tungod kay dunay indikasyon nga dunay pagpasagad nga nahitabo.

Kon tinuod nga diha nay pagpangliki sa yuta pipila ka adlaw sa wala pa modahili, nagpasabot lang kini nga diha nay “warning” nga mahitabo.

Kon nakita na kini daan, angayan lang nga duna nay pagbakwit nga mahitabo sa maong lugar og dili na paaboton pa nga mahitabo gyod ang pagdahili.

Sa pagka-karon, ang pinaka-importante nga buhaton mao ang pag-rescue sa mga kaigsoonan nga nabiktima sa maong pagdahili.

Ug himoon kini hangtod makompleto na ang lista sa nabangalan kon ikompara sa lista sa mga nawala.

Kon makompleto na ang lista, angayan lang nga himoon dayon ang pag-imbestigar sa maong panghitabo.

Daghan ang angay nga mahibaw-an.

Unsay epekto sa gihimo nga quarry sa pagdahili sa yuta?

Unsay angay buhaton aron malikayan ang susama nga panghitabo?

Wala bay gihimo nga pag-inspeksiyon o pag-monitor sa maong lugar taliwala sa gihimo nga pag-quarry niiini?

Angayan ba nga padayonon ang pagpapuyo sa mga katawhan sa mga lugar nga dunay quarry nga gihimo?

Kining nahitabo sa Naga, Cebu nakapahinumdom kanako sa susamang panghitabo kaniadto didto sa Jagna, Bohol.

Dihay pagdahili nga nahitabo; gani, pipila ka mga balay ang nalubong sa maong pagdahili.

Walay gika-report nga namatay sanglit inanay ang maong pagdahili.

Sa akong nakita, hinay-hinay ang pagliki sa yuta hangtod masiak kini ug mobulag hangtod mopalayo na kini sa naandang lugar.