When I feel this way
Samtang nangaon mi, namatikdan ko nga magpasiplat si Juvey nako. Nindot siyag smile. Ug ako sab, aw, mopahiyom sab niya. Naghilom lang si Suzy.
“You know, Belle, guwapa gyud ka. Di ka lisod mahalon. Di kahibudngan nga daghan kag suitors.”
“Salamat sa pagdayeg, Juvs. Parehas nimo. Kon di pa lang ka bayot, guwapo ka. Macho pa gyud.” Mikatawag kusog si Juvey. “Ug kay bayot man, guwapa?”
“Aw, guwapa gyud.” Ako na sab ang mikatawag kusog.
Nahikatawa na lang sab si Suzy.
Gikan sa fast food, nanuroy pa ming tulo. Unya, gihatod na ko nilang Juvey ug Suzy sa akong gipuy-an sa Guadalupe. Mihapit silang duha. Diha mi sa among terrace kay bugnaw ang hangin. Bungalow type ang among balay. Nanginom mig juice.
“Nindot man diay ning inyong lugar, Belle? Gisuginlan ko ni Suzy nga silingan mo kaniadto dinhi.
Nuon, nakahinumdom sab ko ani. Dinhi tuod sila nagpuyo kaniadto. Gamay pa man sab kong bata dihang nangadto na mi sa Canada.” Igo lang kong mitando. “Gimingaw ko aning lugara, Belle. Naa pa man diay nang dakong punoan sa akasya. Anha ta magduwa-duwag tagu-tago kaniadtong mga bata pa ta.”
“Bitaw.” Mubo kong tubag. Namatikdan ko na sab nga nagsigeg tutok si Juvey nako.
“Abi nimo, Belle, kon tinuod pa lang kong laki ron, pangulitawhan ta gyud ka.”
Nag-smile si Juvey, morag wa seryusoha ang iyang gisulti. Aw, moseryuso ba gyud siya nga parehas man ming kasingkasing og girl.
“Tungod ba kay giguwapahan ka nako, Juvs? Tungod ba kay giseksihan ka nako?” Nangigham ko. “You know, Juvs, maoy akong gpangita ang laki nga wa magtan-aw sa akong hitsura. Maoy akong gipangita kanang laki nga nagmahal nako tungod kay iya gyud kong gihigugma, sa way pagtan-aw kon unsa ko, kon kinsa ko.”
Miseryuso ko. Miseryuso sab si Juvey.
“Parehas diay ta, Belle. Mao say akong gipangita ang binuhat nga nagmahal nako sa tinuoray, nga di sab magtan-aw kon unsa ko, kon kinsa ko.”
“Pero lisod na man tingali pangitaon nang mga lakiha, Juvs. Sa kabag-ohan karon, maoy gitan-aw ang hitsura sa tawo, ang sitwasyon sa pagpuyo sa tawo kon dato ba siya.”
Nagkatinan-away mig dugay si Juvey. (SUMPAYAN)