BALAY-BALAY, tuBig-tuBig Katungod sa ilehitimong amahan

Children's Legal Bureau (CLB)

Dear Atty. Joan,

Ako diay si Jeffrey. Naa koy kapuyo ang pangalan kay si Marie, pero wala dyud mi nakasal ni Marie. Sa among pag-uban, gihatagan mi og usa ka anak nga karon kay 5 anyos na. Bag-ohan lang kay nagbuwag mi ni Marie. Karon sa pagbuwag namo kay gidala ni Marie sa ilaha ang among anak.

Ang akong pangutana kay kon pwede ba nako makuha ang among anak? Unsa man ako katungod isip amahan?

Salamat daan.

Jeffrey

Dear Jeffrey,

Dili nimo pwede makuha ang imo anak kay ang naay katungod sa kustodiya sa inyong anak ang inahan niya nga si Marie. Gibutang sa atong balaod nga ang usa ka inahan naay eksklusibong awtoridad isip ginikanan ngadto sa iyang ilihitimong anak. Tungod aning eksklusibong awtoridad isip ginikanan, gihatag sa usa ka inahan ang katungod sa kustodiya sa bata.

Pero ayaw kabalaka Jeffrey, kay dili tungod kay wala nimo ang kustudiya sa imong anak, wala na kay katungod. Naa kay katungod nga mobisita sa imong anak o ang gitawag nato nga visitation rights. Pasabot ani kay naa kay katungod nga makita o ma-access ang inyong anak. Pwede mo magsabot ni Marie sa mga termino og kondisyones sa imo visitation rights. Pero kon di mo magkasinabot, pwede ka mag-file og petition ngadto sa korte para mahusay ang isyo sa imong visitation rights. Atty. Joan

Pahibalo: Kini opinyon lamang nga nag-base sa inyong lakbit-saysay ug kini pwede nga mausab kon dugang pa nga mapatin-awan ang mga detalye. Kon duna kamoy mga pangutana nga dunay kalabutan sa katungod sa mga bata, mahimong mo-message pinaagi sa Facebook account sa CLB.