Ambrad, Martinez, Serrano impresibo sa PSC boxing

Gipangposte nila ni Enrique Ambrad sa RWS Next Gen, Clinton Martinez sa Joeric Boxing Club ug Edward Serrano sa Team Seva ang labing impresibong kadaugan sa Philippine sports Commission (PSC) September Monthly Boxing sa Cebu City Sports Institute sa Sawang Calero niadtong Dominggo.

Ang tulo pulos ningposte og referee stopped contest (RSC) batok sa ilang tagsatagsa ka kontra.

Si Ambrad mipaundang kang Gilbert Talisic sa Arcelo-Liloan sa ika-1:28 sa 2nd round sa 38kgs weight class.

Gipaundang sab ni Martinez si Harry Mirafuentes sa Cebu City sa ika-24 segundos pa lang sa first round sa 39kgs match.

Samtang si Serrano mipaundang kang Justine Requilla sa Wakee Gym sa ika-051 segundos sa 1st round sa 44kgs division.

Nakamugna og split decision nga kadaugan batok sa lainlang kontra mao sila si Brian Barricuatro sa 10,000 Boxing Club, Trisha Mae Llamas sa Cebu City, Ashley Fajardo sa 10,000 BC ug John Ebrada sa RWS Next Gen.

Gilupig ni Barricuatro si Kyle Sumalinog sa Team Seva sa 31kgs division, gibuntog ni Llamas si Cristy Mae Naquines sa 10,000 BC sa girls 46kgs division, gipilde ni Fajardo si Kevin Sumalinog sa Team Seva sa 46kgs match samtang gipukan ni Ebrada si Rey Abella sa Cebu City sa 50kgs final match.

Ang ubang mga ningdaog batok sa lainlaing kontra mao sila si Prince Jake Espina sa Team Joeric (25kgs), David Mancao sa 10,000 BC (26kgs), Rold Jan Delig sa Cebu City (34kgs), Darrel Balderas sa RWS Next Generation (39kgs), ug Adrian Arellano sa Wakee Gym (47kgs).