'WA NAY PAGLAUM' MAY MAKIT-AN PANG BUHI

Mga opisyal sa Incident Command Center sa City of Naga mobalhin na ngadto sa retrieval operations sugod karong adlawa.

Sa usa ka press briefing, si Provincial Disaster Risk Reduction and Management Office (PDRRMO) head Baltazar Tribunalo ug City of Naga Mayor Kristine Vanessa Chiong nagkasabot nga himuon nang retrieval operations samtang nagkagamay ang kahigayunan nga dunay survivors nga makuha sa landslide area.

Si Tribunalo nirekomendar sa pagbalhin sa operasyon human sa ikatulong hugna sa assessment sa dapit sa pagpangitag mga timailhan nga duna pay buhi.

Pipila sa mga dapit nga gikatahong duna pay mga biktima lisod pang maadtoan.

Si Tribunalo niingon nga ang ilang paninguha nga pagkuha sa mga lawas mas mopaspas kay retrieval na ang ilang buhaton ug pagproseso sa mga patay.

REKOMENDASYON

Ang Police Regional Office 7 maoy unang nirekomendar nga himuong search and retrieval inay search and rescue kay gamay na lang ang tsansa nga aduna pay buhi ilawom sa yuta nga mitabon sa kabalayan sa Sitio Sindulan.

Nagtambayayong karon ang National Bureau of Investigation ug kapulisan nga maoy gitahasan nga mokuha sa DNA sample sa mga lawas nga pabilin pa nga wa mailhi.

Nakita sa PNP Crime Lab ug mga rescue team sa City of Naga nga hanap na kaayo ang tsansa nga aduna pay buhi sa ilawom sa yuta mao nga nirekomendar na sila nga search and retrieval, inay search and rescue.

Padayon ang kapulisan ug militar sa pagbantay sa dapit diin nahitabo ang landslide ilabi na nga gipahigayon ang pagpabakwit sa mga residente.

GILUBONG

Kagahapon, gilubong na usab ang laing unom nga nangamatay.

Ang gidungan paglubong mao ang mga sakop sa banay nga Siton nga sila si Althea, Crystal Jean, Juanito, Jocelyn, Emeliana ug Laura Capoy.

Hangtod kagahapon sa hapon, 64 na ang natala nga nangamatay, 18 ang angol ug 28 pa ang missing.

Dunay pay padayon giila nga mga lawas.

Nagtinabangay ang kapulisan ug NBI alang niini.

ANGAY NGA IDONAR

Human makit-i nga aduna’y mga di na magamit nga butang ang gilakip og donate alang sa mga biktima sa landslide sa dakbayan sa Naga, niawhag karon ang Department of Social Welfare and Development (DSWD) sa publiko nga unta di kini ilakip og donate.

Matod ni DSWD 7 Regional Director Evelyn Macapobre nga di angay sa mga biktima nga maltratuhon og ingon niini karon nga nag-atubang sila’g kalamidad.

“Again, let us preserve the dignity of the displaced families, so I am earnestly requesting the public to only donate usable things,” si Macapobre nagkanayon.

Dugang ni Macapobre nga natuki ug nasabutan niadtong Septiyembre 24 atol sa Incident Command meeting nga ang donasyon sa gamit nga tickets gi-discouraged na ang used clothings.

Kining mga hygiene kits, gatas, school supplies, habol, banig, unlan, diapers, underwear, ECO bags ug dagko nga plastic boxes ang gikinahanglan sa mga evacuees.

Kon ugaling mo donar og senina, hangyo nila nga bag-o nalang unta ang i-donate.

Alang usab sa gusto mo-donate og pagkaon, kinahanglan nga mo coordinate sa donations desk sa Naga City aron ma-schedule kini.