11 ANG PATAY
7 SA ENGKWENTRO SA BUY BUST SA LAPU-LAPU; LAING 4 GIPAMUSIL
Maduguon kaayo ang Miyerkules sa dakbayan sa Lapu-Lapu.
Walo ka mga tawo ang nangamatay, pito niini sa usa ka
police operation kagahapon sa hapon, samtang ang usa gipusil sa riding in tandem kagahapon sa kaadlawon.
Niadtong Martes, duha ka mga traysikol drivers ang gipamusil patay usab sa riding in tandem.
Kagahapon sa buntag, usa ka traysikad driver gipusil usab sa riding in tandem sa dakbayan sa Mandaue.
Kagahapon sa hapon pito ka mga tawo ang nakalas sa engkuwentro tali sa kapulisan sa Lapu-Lapu City sa Sityo St. Michael, Barangay Pajac.
Ang kapulisan nihimo og follow-up operation sa sunodsunod nga pagpusil sa dakbayan ug pagtubag sa armed person alarm sa area.
Nagsilbe usab kini nga drug bust.
GIPAMUSIL
Sa dihang nisulod sa interior nga bahin, ang mga sakop sa composite team sa Lapu-Lapu City Police Office (LLCPO) giunhan og pabuto sa armadong residente sa lugar nga niresulta sa pinusilay.
Giila ni Supt. Mark Sucalit, hepe sa City Intelligence Branch, ang mga namatay nga sila si Abundio dela Torre Jr., alyas Junior; Allan dela Torre, alyas Junaid/Tema-tema; Mohaimen Conda Mauyag, alyas Mohaimen; a certain Jovan; Shainoden Dimasimpan alyas Monsoy; a certain Mantak; Manuel Pepito alyas Junior, pulos hamtong ang pangidaron ug residente sa naasoyong lugar.
Giklaro sa opisyal nga way pulis nga naangol o nakalas atol sa maong shoot-out.
“Karamihan ini mga batanon. Dili lang ni usa ka religion, halo-halo ni,” matod ni Sucalit. Sumala pa ni Sucalit nga
“newly identified” ang maong grupo nga gun-for-hire diin ang mga nahisgutan nakuhaan og tagsa ka mga short firearm.
Nalambigit sab kini sa illegal drugs base sa gihimong validation sa kapulisan.
Nasayran nga duha sa pito ka mga gihinganlan napasakaan og kasong murder may labot sa kamatayon niadtong tinun-an sa Indiana Aerospace University nga si Kristian Saldavia nga gipusil niadtong Agosto 16, 2016 kay giingong na-alaan nga police asset. Base sab sa intelligence information nga susamang grupo ang nipatay niadtong 26 anyos nga security guard nga si Laurencio Revijane kagahapon sa kadlawon sa may Barangay Basak, samtang nagmaneho sa iyang motorsiklo.
Nagduda si Sucalit nga naalaan sab si Revijane nga police asset kay ang motorsiklo adunay sticker sa LLCPO.
Ang tanang armas nga nahipos sa Scene of the Crime Operatives (SOCO) team ipa-ubos sa ballistic examination aron sa pagtino kon susama ra ang armas nga gigamit sa pagpusil patay ug mga pagpamusil sa Lapu-Lapu City.
Dugang pa sa opisyal nga nagpadayon pa ang ilang operasyon ilabi na nga ang lider (identity kasamtangang gipugngan) sa maong pundok giingong nagtago-tago na.
Kagahapon sa kaadlawon, si Revijane, gipusil patay sa may Sityo San Roque, Barangay Basak kagahapon sa ala 1:30 sa kadlawon.
Sa imbestigasyon ni SP01 Luisito Ernie, Homicide Section, nagmaneho sa iyang motorsiklo sa Revijane aron mopauli sa ilang balay.
Ang wa pa mailhing mamumuno nag-atang ug mipusil kang Revijane tumong sa dughan.
Gidali pa sa pagdala sa Mactan Doctor’s Hospital ang sikyu apan gideklarar nga dead on arrival.
Sa laing pagpamusil, gipatay sa riding in tandem ang traysikol driver nga taga Sityo Kagudoy, Barangay Basak Martes sa alas 6:39 sa gabii.
Ang biktima giilang si Alem Samad, taga Sityo Kagudoy, Barangay Basak.
Base sa inpormasyon nga nahipos ni P01 Anthony Piencenaves, Homicide Section nga nagpanawag og pasahero si Samad sa may paradahan sa Sityo Datag, Barangay Maribago nga mobiyahe paingon sa Tamiya, Basak.
Ang duha ka lalake nga nagmotorsiklo nibutho ug namusil makadaghang higayon sa biktima nga niresulta sa iyang hinanaling kamatayon.
Samtang ang pasahero nga si Lecencio Taghoy Jr., 27, promodiser sa usa ka grocery store sa Tamiya ang nasamdan atol sa hitabo.
Si Taghoy anaa sa usa ka pribadong tambalanan ug nagpaalim sa iyang samad nga naangkon.
Lima ka oras sa wa pa gipatay si Samad ,usa ka 39 anyos nga traysikol driver sab nga si Ernie Amistad Jr., 39, taga-Barangay Pajac ang gipusil ala 1:20 sa hapon sa maong adlaw.
Riding-in-tandem sab ang nibira sa biktima.
Wa na makamata pa si Amistad sa iyang pagpahuway sud sa iyang traysikol samtang nagpaabot og pasahero .
Sigun sa saksi nga wa sila makakita sa panagway sa gunman kay nagtaptap ug nag-helmet.
MANDAUE
Kagahapon pasado alas 6 sa buntag, natala ang ika-24 nga kaso sa pagpusil-patay sa Brgy. Cambaro sa dakbayan sa Mandaue.
Giila ang biktima nga si Edwin Monson, 46.
Gipusil kini sa lalaking angkas sa motorsiklo, samtang ang biktima nagmaneho og trisikad.
Dead on the spot si Monson human nakaangkon og mga samad pinusilan sa liko sa lawas ug ulo.
Matod ni Police Sr. Supt. Julian Entoma nga may kalambigitan sa ginadiling drugas ang gitan-aw nga motibo sa pagpatay kang Monson kay anaa kini sa drug watchlist sa Opao Police Station.