3 ka tunghaan sa Naga magklase na sugod karon
Tulo ka mga eskwelahan nga gihimong evacuation center sa mga apektado sa landslide sa Barangay Tinaan, Dakbayan sa Naga magklase sugod karong adlawa.
Mosunod ang duha ka dagkong mga tunghaan og abli karong Lunes nga kasamtangang apil sa gihimong evacuation center.
Matod pa ni City of Naga schools division superintendent Gregorio Cyrus Elejorde nga shifting ang paagi nila sa ilang pagtudlo sa mga evacuees.
Ang mga eskwelahan nga pagaablihan karong adlawa sa Department of Education (DepEd) mao ang Naalad Elementary School, Langtad Elementary School ug National Power Corporations-NPC Colon.
Sa umaabot nga Lunes ang duha ka mga eskwelahan nga pagabuksan mao ang Naga Central School ug Naga National High School.
Giklaro ni Elejorde sa mga magtutudlo nga ilang I-adopt ang two-subject curriculum.
Kini nagpasabot nga ang mga ginikanan ug mga anak magdungan sa pagkat-on og duha ka subjects, ang livelihood ug ang usa physical education.
Dugang pa ni Elejorde nga ang mga magtutudlo ang motudlo sa mga evacuees ug mga estudyante tungod kay nag-agi man sila og skills development training ug physical education.
“Mao nang among daghan mig purpose nga naa ang mga expertise. We call it normalization activities because lahi man nang ginganlan nila og psychosocial intervention,”pasabot ni Elejorde.
HINABANG SA LAPU
Karong adlawa itunol ni Lapu-Lapu City Mayor Paz Radaza ang financial assistance nga P2 milyones ngadto kang Naga City Mayor Kristine Chiong alang sa mga nabiktima sa landslide.
Giaprobahan kagahapon sa Konseho sa Lapu-Lapu ang resolution nga nagtugot nga makapagawas og P2 milyones gikan sa donation fund sa Siyudad.
Nipasabot si Radaza nga iyang nakita nga dako og matabang ang financial aid nga magamit sa uban pang panginahanglan sa mga biktima ilabi na nga gipabakwit kini og wa napabalika sa ilang balay.
"Magamit ni nila to buy construction materials sa kadtong magtukod og balay o sa uban pa nilang kinahanglanon,” tipik sa pamahayag sa mayor atol sa regular press conference.
Nipasabot ang opisyal nga wa na sila makapadala og rescue team kay gawas nga kuwang ang personnel, na-atol sab nga nasinate ang ngil-ad nga panahon sa mga milabayng semana.
Ang mga personnel iyang gi-detail sa nagkadaiyang mga coastal area sa mainland Lapu-Lapu ingon man ngadto sa Olango island.