Gunman ni Chiaco nailhan tungod sa tingog

Gunman sa pagpusil-patay sa Filipino-Chinese businessman nga si Johnson Chiaoco nasikop niadtong Martes sa udto human nga suway unta kining mangwarta sa nahibiling pamilya sa biktima.

Kanhi kasusyo sa negusyo sa biktima, pabiling maoy gitumbok nga nagsugo sa pagpapatay kang Chiaoco.

Ang nasikop giilang si Ronald Ramos, 37, kanhi usa ka security guard, lumad nga taga Brgy. Romarate, lungsod sa Aurora, Zamboang del Sur, ug kasamtangang nagpuyo sa lungsod sa San Fernando, lalawigan sa Sugbo.

Nasikop si Ramos diha dapit sa usa ka mall sa Mantawi drive sa North Reclamation Area sa siyudad sa Mandaue.

Matod ni P/SSupt. Julian Entoma ang director sa Mandaue City Police Office nga sa niaging semana nanawag sa landline si Ramos sa tindahan sa biktima, ug nakighinabi sa secretary dayon sa asawa sa biktima, giingong buot niini nga mangayo og kwarta bugti sa pagtudlo sa nipatay kang Chiaoco.

Dugang ni Entoma nga paghulagway sa secretary nga ang nanawag sama sa tingog sa nanawag niadtong Hunyo nga nanghulga nga gisugo siya sa pagpatay kang Chiaoco, ug nga di ra kini patyon kon tugbangan ang ibayad sa nagsugo,apan gibaliwala ra kini sa biktima.

Daling nakig-alayon ang pamilya ngadto sa kapulisan.

Usa usab ka saksi ang niduol sa kapulisan, nga nibutyag nga nakakita kini sa nawong sa mamumuno, human nga giisa niini ang visor sa gigamit nga helmet, sa dihang nanarapo sa iyang singot sa nawong sa dayong angkas sa motor nga gisakyan pagsibat duol sa crime scene.

Hinungdan nga atol sa pagpakigtagbo sa usa sa mga kawani sa pamilyang Chiaoco kang Ramos, positibong giila sa saksi si Ramos hinungdan nga dali kining gisikop sa mga pulis nga naglangkob sa Special Investigation Task Group kon SITG si Chiaoco.

Nasuta sa kapulisan sa FB account ni Ramos nga diha sa private message gihimo ang transaction tali kaniya ug sa middleman niini nga ipapatay si Chiaoco bugti sa kapin P200,000.