Loot wa molarga gawas sa nasod

Kampo ni Daanbantayan Mayor Vicente Loot hugot nga nanghimakak nga nilarga gawas sa nasud ang mayor human usab nikatap sa social media ang suwat niini sa Kapitolyo nga nangayo og authority to travel.

Matod sa asawa ni Loot nga si Maria Luisa, wa nilarga bisan asa ilabi na gawas sa nasud ang iyang bana.

Kini taliwala sa nikatap sa social media nga kopya sa suwat nga gipadala ni Loot kang Gob. Hilario Davide III niadtong Hulyo 17, diin nananghid siya nga molarga sa Amerika sa Agusto 28 ngadto sa Septiyembre 10.

Sa maong suwat, gipadayag ni Loot nga mangayo siya og authority to travel alang sa iyang “personal” nga biyahe. Makita sab sa suwat ang pirma ni Davide, nga nagmatuod nga giaprubahan niya kini.

Alang ni Maria Luisa, ang mga nagpakatap labot sa paglarga sa iyang bana sa laing dapit, posibleng nagtinguha nga mapulihan na ang mayor sa iyang pwesto.

Apan matod niya, di kini mahitabo hangtud nga wa pay eleksiyon. Gitug-an sa kanhi mayor nga sa 2019 elections, ang iyang anak nga si Bokal Sun Shimura maoy magpapili pagka-mayor sa Daanbantayan.

Gihimug-atan ni Maria Luisa nga kon nilarga pa ang iyang bana, di unta magpadayon ang serbisyo sa lungsod sa Daanbantayan. Wa hinuon motug-an pa si Maria Luisa kon asa karon si Loot.

Sa nasayran, si Loot pila ka higayon na nga gilambigit ni Presidente Rodrigo Duterte sa isyu sa ilegal nga drugas.

“Kinsay nag-ingon nga nagtravel? Wala man mo-travel. Wala man siya mo-travel, nganong nag-travel man? Nganong di man ninyo tan-awon sa manifesto sa Immigration ug ni-travel o wala. Ka-easy ana,” padayag ni Maria Luisa.