LANGYAW GITULIS, P1M NADALA

Taiwanese national nga gikan nag-withdraw sa banko sa dakong kantidad sa dolyar ang gitulis sa duha ka wa mailhing mga suspek pasado alas 3 kagahapon sa hapon sa MJ. Cuenco Avenue, Barangay Mabolo sa siyudad sa Sugbo.

Gipusil pa sa mga suspek ang gwardya sa banko dihang nabantayan niini nga padung na kining motabang sa biktima apan swerte nga wa kini maigo sa pagpamusil.

Ang biktima giila nga si Pien Shu Ching, hingkod nga pangidaron nga giingong bag-o lang naabot gikan sa nasud sa Taiwan ug Felipe Co Tan nga taga Maria Luisa Village sa barangay Banilad, siyudad sa Sugbo.

Matod sa gwardya sa Metrobank nga padung na mosakay sa sakyanan nga gi-parking sa gawas sa banko ang mga biktima apan kalit lang naabot ang duha ka lalake nga nag-motor ug dayong labni sa bag niini.

Tungod sa kakusog sa paglabnot sa bag nahayang ang Taiwanese ug dayong pamusil sa gwardya nga naa sa gawas sa pultahan.

Dali nga nakapadagan paingon sa Mabolo church ug wa na mahibaw-i kun asa kini paingon.

Sa imbestigasyon sa Mabolo police station moabot ngadto sa $19,400 ang nakuha sa mga tulisan nga kun kini pasensiyohan sa peso mok bat kini sa sobra sa usa ka milyon.

“Atoa pang gipaimbestigar ang insidente kun naa ba tay mailhan atong duha nga nanulis, nganong nakahibawo sila nga mag-withdraw og kwarta ang Taiwanese mao na ang subayon nato karon,” matod ni P/CInsp. Dindo Alaras.

Gipasubay na usab nila ang CCTV camera sa dapit aron makuhaan sa hulagway ang mga suspek ilabi na nga ang gwardya wa makaklaro sa pamayhon sa mga tulisan.

Usa sa mga imbestigador sa Mabolo police station aduna silay gipangdudahan nga mao usab karon ang ilang tan-awon ilabi na sa ilang rouges gallery.

Nagtuo si Alaras nga mga local boys ang mga tulisan tungod sa estilo sa iyang pagpanulis.

Apan wa usab nila wad-a ang posibilidad nga adunay mga dayo nga mga criminal tungod sa presensya sa mga sakop sa Parojinog nga napatay sa laing grupo sa mga criminal sa siyudad sa Mandaue niadtong miaging semana.