Pangangkon ni Garma

So, duna na kunoy nailhan ang atong kapulisan kon kinsa ang mastermind ug ang mipusil-patay sa usa ka negusyanting Hapon niadtong Agusto 24 sa Natalio Bacalso avenue, dakbayan sa Sugbo. Kini maoy gibutyag ni Cebu City Police Office (CPPO) chief Senior Supt. Royina Garma kalabot sa pag-ambus sa 70-anyos nga si Junko Hamada.

Ang pag-ila sa mga suspek gibase sa ilang nakuhang mga tistego ug ingon man ang pag-angkon sa usa sa nalambigit sa maong maduguong krimen.

Wala pa nila ibutyag ang mga pangalan niini, apan si Garma misaysay nga kini nataymingan lang nga ang duha ka mga drug suspek nga ilang nadakpan niadtong Sept. 21 sa Barangay Tisa, miangkon atol sa ilang pagsukit-sukit nga aduna silay nahibaw-an sa kamatayon ni Hamada.

Matod pa nga ang suspek nga si Alfie Fernandez, miangkon nga siya mismo nakaila kon kinsa yud ang nibira sa biktima.

Gibutyag usab ni Fernandez nga nakadungog siya sa triggerman nga nakig-istorya sa mastermind sa nahisgutang krimen.

Ang iyang ig-agaw nga si Mary Jane Aguilar, kinsa nadakpan usab atol sa gipahigayong ronda sa Tisa, miangkon nga diha siya sa maong hitabo ug iyang boyfriend diay ang triggerman.

Matod kuno niya, nga nag-angkas siya niini atol sa hitabo. Maayo ni, kay atleast adunay kalamboan sa maong krimen.

Pero ambot og unsay gustong ipalutaw ni Garma nga iya na man dayon gikonsiderar nga solbad na kuno ang maong kaso.

Kakataw-anan. Wa pa gani madakpi ang mga suspek, wa pay klaro kon tinuod ba ning gipanulti sa ilang mga nakuhang witness nga ila ra pud nga dinakpan, unya konsiderar na nimo nga sulbad na ang kaso?

Pastilan. Pag sure diha Garma, uy. Dakpa una ang mga suspek, itaral sa hukmanan aron didto mahibaw-an kon sulbad ba yud ang kaso.