Asa na ang suspension order?

Dugay na kaayo kining hugon-hugon nga ma-suspenso ang ‘kanhi laos nga pulitiko’ nunot sa daghang mga kasong administratiba nga iyang gi-atubang sa Office of the President. Apan ang tanan puro huhungihong lang ug wala pa yud ma-implementar.

Apil na niini ang illegal nga operasyon sa V-Hire terminal sa Kamgayan, ang padawat niya og duha ka Dodge Charger nga mga sakyanan gikan sa Big Foot nga atoa na sa iyang pag-umangkon kay gipalit kuno, pag-abre pagbalik sa Inayawan Sanitary Landfill, ang pagtudlo sa iyang asawa nga si Konsihal Margot Osmena nga deputy mayor nga mahulog og nepotism, ang pagtudlo og duha ka acting mayor sa dihang on-official leave siya ug uban pa.

Igo lang gikataw-an sa ‘kanhi laos nga pulitiko’ ang maong tsika sa iyang suspension. Matod pa niya nga binuhatan lang kini aa iyang kaatbang nga si Presidential Assistant for the Visayas Michael Dino ang maong mga tabi-tabi. Pero unsa man ning dokumento nga akong nahuptan nga pinirmahan ni Executive Secretary Salvador Medialdia nga nagpa-ubos sa ‘kanhi laos nga pulitiko’ sa preventive suspension balig 60 ka adlaw basi sa rekomendasyon ni Acting Secretary Eduardo Año sa Department of Interior and Local Government (DILG) nga nag-imbestigar sa maong kaso?

Kining maong kaso nakasumikad reklamo nila ni Joey Alfar ug broadcaster Roger Cimafranca nga grave misconduct, abuse of authority ug kalapasan sa Republic Act 6713 kon ‘Code of conduct and Ethical Standards for public officials and employees. Kini gumikan sa pagputol sa ‘kanhi laos nga pulitiko’ sa suporta niini sa kapulisan ning dakbayan. Nasang-at ang maong kaso niadto pang September 2016 unya gipatubag siya niadtong Marso 2016. Ipa-ubos siya sa duha ka buwan nga suspension samtang magpadayon ang DILG pag-imbestigar sa maong kaso aron dili maka-inpluwensiya ug makahulga sa mga saksi ug pagtago sa mga ebedensiya. Pero nganong wala pa man kini ma-serve ang maong order? Dunay nagpugong?