Panagsa na lang
Dear Noy Kulas,
Itago lang ko sa ngan nga Lindo, 20 anyos. Ang akong problema kabahin sa akong uyab nga naa sa abroad nagpuyo.
Actually silingan mi sa una but few years ago nang-migrate sila tibuok pamilya. Ang first year namo maayo kaayo kay constant ang among communication. Supportive kaayo ang ang iyang family sa among relationship mao nga maayo ni og dagan. But nagkadugay, nagkausab na siya. Maayo lang kon mag-communicate mi og ka usa in a month. Busy kuno kaayo siya sa iyang studies ug part-time work. Sa sugod, nakasabot ra ko pero, dihang nakabantay ko sa iyang Facebook nga naa silay mga laag sa barkada, diha na ko nalain. Di siya tig-post kaayo, i-tag siya sa iyang mga kauban.
Ako na siyang gipangutana bahin ani, pero masuko na man hinuon. Daghan na kaayo og estorya. Magsige na siya og panghagit nga magbuwag mi pero di ko makaako kay love kaayo nako siya. Noy, unsa may akong buhaton aron mawala ang akong pagduda niya nga naa na siyay lain? Pero bisan unsaon nako di mawagtang sa akong huna-huna ang kabalaka nga iya kong ilisan. Please tambagi ko.
LINDO,
Lindo,
Kinahanglan nga imong dawaton ang mga kausaban sa iyang kinabuhi kay lahi na nga kalibutan ang iyang gipuy-an. Kon diri sa atoa makaya ra ang magtambaytambay kay naa may madangpan nga pamilya, sa abroad di mahimo nga magtinapulan ka kay di ka mabuhi. Busa kayod taman sa ginhawa ang imong buhaton. Mas lisod ang kinabuhi niya kay motrabaho ug moeskwela siya. Kanang iyang pagtrabaho, para na pang support sa iyang eskwela. Natural nga maglingawlingaw siya aron magpawala sa stress.
Busa, sabta siya kon panagsa na lang siya maka communicate nimo. Instead imong dudahan o awayon, i-encourage siya nga maninguha sa pag-eskwela aron hayag ang iyang kaugmaon. Ingna siya nga nakahibawo ka nga she is not doing it for herself ug sa iyang family, kon di sa inyo usab nga ugma damlag. Inay mangaway ka, imong iampo nga magpabilin mong lig-on taliwa sa kalagyo na sa inyong duha ka mga kaugalingon. Mao na ang usa sa mga maayong ingredient sa long distance relationship (LDR). Ayaw na pangaway kay you are driving her away sa imoha.
NOY KULAS