When I feel this way
Sa misunod nga mga adlaw, kanunay na ming nagkontakay sa selpon si Juvey. Siya ang unang manawag nako, o kaha moteks. Iyang gisulti nako nga si Suzy ang naghatag kaniya sa akong number. Malingaw kong makig-estorya kang Juvey. Maayo siyang mopakatawa. Nindot siyag mga jokes ug di korni.
Usa ka buntag nga namisibis ko sa mga tanom sa hardin sa among lawn, iya kong gibisitahan.
Mikidhat si Juvey nako dayong paikid-ikid sa iyang sampot ug minalditang nag-smile nako. Nanglingkod mi duol sa hardin kay duna may mga lingkoranang uway. Gitawag ko ang among katabang aron dalitan og kape ang bayot.
“Sus, ayaw anang kape, Miga. Di maayo natong mga girls. Ang maayo mao ang gatas kay makapasamot sa kanindot a atong kutis.”
Napahiku-hiko si Juvey sa iyang lawas ug naghapak-hapak og hinay sa akong bukton, dayon iyang gipislit ang akong aping. Nahikatawa na lang ko. Ug gatas ang gipahatag ko kang Juvey.
Ipaila-ila ko sa imong mga suitors, Belle. Himbisan nako kon angayan ba para nimo.”
‘Na, wa na mobalik sa ilang pagpamisita nako, Juvs, uy. Pulos ko silang gipang-basted.”
“Sayang. Basig duna koy mapilian nila. Di para nimo, ha, kondi para nako.”
Nagkinataw-anay mi si Juvey ug nag-aper mi. Kaguwapo unta aning kanahan, uy, kon nagpaka lalaki pa. Nuon, daghan man rong mga bayot nga nagpasad sa kalibotan. Di na sila mauwaw nga moladlad sa ilang pagka bayot kay gidawat na man ang third sex ron sa society. Di parehas kaniadto nga bugal-bugalan sila.
“Sure ko, Belle, nga dinhi sa Cebu ko makita ang akong one and only love.”
“Bitaw, no, Nindot unta kon taga dinhi sa ato nang lakiha.”
Gipaundayonan ko na lang si Juvey. Sunday niadtong adlawa. Nagkasabot mi si Juvey nga mag lunch mi sa usa ka fast food sa downtown.
“Basig indyanon ko nimo, ha, Belle? Di ka moabot?”
“I’ll be there lagi. Pakuyoga si Suzy.”
Mipauli na si Juvey. Gitiwas ko ang pagpamisibis sa akong mga tanom nga buwak sa hardin. Unya misulod na ko sa balay aron maligo.
Hapit mi magkadungan si Juvey pag-abot sa fast food nga among gikasabotan nga magkita. Nag-inusara lang siya. Wa si Suzy. (SUMPAYAN)