100 KA BALAY NAUGDAW

■ IMPIYERNO: Sama og impiyerno ang nagdilaab nga kayo nga milamoy sa 80-100 ka mga balay sa Barangay Hipodromo, Dakbayan sa Sugbo. Lakip sa nasunog mao ang balay ni Kerwin Espinosa, ang selfconfessed drug lord, iyang kabanay, ingon man balay ni Barangay Kapitan Ruperto Bacolod, Jr. Kuryente ang gituohang sinugdanan sa kayo.

Gibana-bana nga 80 ngadto sa 100 ka mga balay, usa niini balay sa self-confessed big time drug lord nga si Kerwin Espinosa ang naugdaw sa sunog nga niigo sa sitio Cahipa, Barangay Hipodromo, siyudad sa Sugbo kagahapon sa hapon.

Lakip usab sa nasunogan ang barangay kapitan.

Mokabat sa P2 milyunes ang gibana-banang danyos sa sunog.

Nadawat sa kabomberohan sa syudad sa Sugbo ang alarma sa sunog alas 3:10 sa hapon ug giisa dayon kini sa 2nd alarm alas 3:13 sa dihang mikusog pa ang kayo nga nilamoy sa kabalayan nga ginama lang sa light materials.

Pagka alas 3:20, gisaka na usab nila sa 3rd alarm ang status.

Gumikan sa kahagip-ot sa karsada, naglisod ang mga

fire volunteer ug firefighters sa pagpawong sa kayo, gani mikusog pa pag-ayo.

Tungod sa kakusog na sa kayo, gideklarar nila ngadto sa Task Force Alpha pagka alas 3:40 sa hapon, diin kadtong mga silingan nga fire substation mahimo na nga moresponde.

Matod ni Kapitan Ruperto Bacolod Jr. nga nagsugod ang kayo sa balay ni Ramie Ynopiquez nga gituohan nga tungod sa kuryente.

Dali kining nikatap sa mga silingan nga balay.

Lakip sa naugdaw ang balay ni Bacolod tungod kay naa sa interior portion ang iyang balay ug ang ilang chapel nga Birhen sa Fatima.

“Apil akoa, wala gyud koy nadala. Kusog kaayo ang hangin gud. Murag ang tibuok Cahipa ang nasunog kay apil man ang chapel nga naa pa gani naghaya,” matod ni Bacolod.

Adunay usa ka bombero ang giingong naangol human makaangkon og paso sa lawas.

Si Nagiel Bañacia, pangulo sa Cebu City Disaster Risk Reduction and Management Office, nagkanayon nga huot kaayo ang karsada hinungdan nga naglisud ang mga fire volunteer sa pagplastar sa ilang mga hose. Niatras usab ang mga Chinese

fire volunteer, matod ni Bañacia, nga posibling nalisuran sa lugar.

“Tubig unya mi akak ang Chinese. Ang una pag koan miatras, nahutdan daw silag tubig,” matod ni Bañacia.

Usa sa mga fire truck sa Cebu City Fire Department ni-over heat.

Gani gitulod nalang kini sa mga residente sa Hipodromo.

Alas 4:19 sa hapon gideklara sa BFP nga kontrolado na nga di na kini makakatap pa sa mga silingang kabalayan.

Matod ni Sr. Fire Officer 1 Maurice Oporto, imbestigador sa Mabolo fire sub station, nga ila pang subayon kon unsa gyuy hinungdan sa sunog.

Gibana-bana nga moabot ngadto sa P2 million ang danyos sa kinatibok-an sa sunog.

Si Vice Mayor Edgar Labella mopasusi kon angay ba nga padak-an ang karsada sa Hipodromo tungod kay nakita niini nga delikado ang maong dapit kon adunay sunog tungod sa ka gagmay sa dalan.

Mahimo ra hinuon nga makabalik sa ilang balay ang mga apektadong residente kung kon way problema sa ilang gi okupahang luna. “Tan-awon nato parti sa pag

re-block aning areaha, kinahanglan nga makabalik gyud ni sila. Kon 93-1 ni, aw walay problema,” matod ni Labella.