MGA KRIMINAL GIHINGINLAN NI RADAZA

Palayason ni Lapu-Lapu City Mayor Paz Radaza ang mga konstituente nga nagdala og kagubot sa siyudad human sa engkwentro tali sa kapulisan ug grupo nga gidudahan responsable sa sunod-sunod nga pagpamusil patay sa dakbayan.

Duha sa mga kabanay sa pito ka mga tawo nga namatay atol sa pinusilay sa Sityo St. Michael, Barangay Pajac, mihimakak nga nalambigit sa ilegal nga binuhatan ang ilang kaliwat.

“Molihay na lang sila. Mohawa sila diri sa Lapu-Lapu kay magdala ra man og gubot,” matod ni Radaza.

Mopadangat sab og communication si Radaza ngadto sa mayor sa Dipolog City nga unang mipadala kaniya og suwat sa miaging semana sa dihang ginikanan niadtong tinun-an sa Indiana Aerospace University nga Kristian Saldavia, 19, gipusil patay niadtong Septiyembre 16 sa may Sityo Kagudoy, Barangay Basak nga lumad nga taga-Dipolog City nidangop sa ilang mayor.

Pahibaw-on ni Radaza ang opisyal sa Dipolog kalabot sa kamatayon sa pito, kinsang grupo gidudahan nga maoy nipatay kang Salvadia, kinsa naalaan nga police asset.

Ang hepe sa Police Station 4, Chief Inspector Juan Capacio nibutyag nga ang duha nga nalakip sa pagkamatay atol sa encounter niadtong Miyerkules nga sila si Abundio dela Torre Jr. alyas Jay-r, 17, ug Shainoden Dimasimpan, alyas Monsoy, nag-atubang og kasong murder may kalabutan sa kamatayon ni Saldavia.

Nagkanayon si Capacio nga ang maong pundok involved sa tulis, pagpamaligya og ginadiling drugas ug magpatakag pamusil sa ilang mga gidudahan.

Lakip nga gisusi sa kapulisan ang kalambigitan sa grupo sa kamatayon sa civil engineer nga si Arsenio Ycong, 52, kinsa gipusil una gilangkat ang bulawang alahas niadtong Agosto 18, nga igo lang nagpalit og maka-on sa Sityo Bliss, Pajac ug ang pagpusil patay ni Laurencio Revijane, 26, security guard nga na-alaan nga police asset.

Samtang inahan ni Abundio nga si Guillerma dela Torre, 50, nihimakak nga involve sa illegal activity ang iyang menor de edad nga anak.

“Di man na siya badlungon. Wa man ko kakita nga duna na siyay armas,” emosyonal nga asoy sa inahan.

Iya na lang dawaton ang nahitabo ug di na siya mangayo pag hustisya kay wa siyay ikagasto gumikan sa ilang kalisod sa pamuyo.

NAPAGAN?

Si Fe Laum, 49, live-in partner ni Manuel Pepito, 46, kinsa napatay sab sa joint operation, wa makatuo sa gidangatan sa iyang kapuyo nga diha ra natulog sa ilang balay niadtong higayona.

“Didto man kuno na nanagan ang mga batan-on sa amoa, nya girakrakan man kuno among balay,” saysay ni Laum nga wa diha sa ilang pinuy-anan atol sa encounter.

Siya nagtuo nga naalaan ang iyang kapuyo nga usa ka plumber ug mamaligya og taho ug puto cochinta gumikan kay suod sa mga batan-on nga mao untay tuyo sa mga pulis.

Ang namatay naglakip nila ni: Abundio de la Torre, Jr @ Jr; Allan de la Torre @ Junaid/ Tema- tema; Mohaimen Conda Mauyag @ Mohaimen; usa ka gihinganlan og Jovan; Shainoden Dimasimpan @ Monsoy; a certain Mantak; ug Manuel Pepito @ Junior.

GISUSI SA MCPO

Nagduda si Mandaue City Police Office Director, Senior Supt. Julian Entoma nga posible may kalambigitan usab ang maong grupo sa pagpamusil-patay sa Syudad sa Mandaue.

Matod ni Entoma nga makig-alayon sila sa kapulisan sa Lapu-lapu City Police Office alang na unya sa pag-match sa resulta sa ballistic examination sa mga armas nga nakuha gikan sa pito ka mga napatay sa Lapu-Lapu City ug sa nahipos nga slugs ug empty shells sa mga nabiktima sa pagpusil-patay sa Mandaue City, diin motor-riding in tandem ang mga responsable, ilabi na niadtong mga nalambigit sa drugas nga mga biktima.

“Kay kana sila mag-cleansing sa drug syndicate, mokuha sila og mga tirador. nga gikan sa laing lugar. Ako ipatan-aw labi na kato mga armas nga .45 caliber duna gyud posibilidad,” gitug-an ni Entoma sa Superbalita Cebu phone interview.

Dugang ni Entoma nga ila usab susihon pagbalik ang mga tulis sa dakbayan sa Mandaue sayo ning tuiga nga hangtud karon wa pa maresolbar, kon ang grupo ba sa taga barangay Pajac ang niigo.

MOIMBESTIGAR

Ipa susi sa Police Regional Office 7 ang mao nga pinusilay.

Matod ni Chief Supt. Debold Sinas nga aron masuta kon nasubay ba sa PNP operational procedure ang gihimo sa kapulisan, iyang gimandoan ang Regional Investigation and Detective Management Division-7 sa pag imbestigar.

Lakip sa mohimog linain nga imbestigasyon ang Regional Internal Affairs Service RIAS-7 aron di magduda ang publiko nga gi white wash lang ang pagsusi.