Nangandoy maka jackpot sa lotto

Sa dili pa mopusta sa dinagko nga jackpot sa lotto si Felipe Inoc, 75, itandi una niya ang nanggawas na nga mga numero sa nangaging mga bola, i-analyze dayon i-compute.

Siya nakahinumdom nga nakaigo og lima ka numero nga iyang gi-analyze sa nidaug nga numero sa jackpot sa 6/45 nga 8, 12, 22, 24, 38, 42 diin kapin sa P23 mil ang iyang nadawat nga bahin.

Asoy sa 75 anyos nga retiradong gwardya nga nagsugod siya og pusta sa lotto dihang bag-o pa lang kini gisugdan sa Philippine Charity Sweepstakes Office (PCSO).

Katulo sa usa ka adlaw kon motaya si Inoc sa Swertres nga tag P12 ang matag ticket ug laing pagpusta usab sa Mega 6/45, Super 6/49 ug Ultra 6/58 lottos.

Kon siya ang modaug sa sobra P734 milyones nga jackpot sa Ultra Lotto, mopalit siya og yuta ug balay, mohatag sa mga charity ug foundations ug sa mga biktima sa landslide sa dakbayan sa Naga.

“Dako kaayo na kwartaha, kinahanglan i-share na sa mga nanginahanglan,” sigon ni Inoc.

Sama niya, nangandoy usab si Ramon Abarre, 55, usa ka habal-habal ug family driver, nga modaug sa Ultra 6/58 lotto nga bolahon sa PCSO sa matag Martes, Biyernes ug Dominggo.

Sama ni Inoc, nagsugod og pusta sa lotto si Abarre dihang bag-o pa lang kini nagsugod ug P10 pa lang ang matag ticket.

Siya niangkon nga dako na siya og pilde sa sige og pinusta sa lotto.

“Mangandoy man ta mamilyonaryo mao sige ta og taya. Kay kon dili ka motaya, di man sad ka makadaug,” paambit ni Abarre nga high school ang natapos.

Siya nakasuway na usab nakadaug sa Super 6/49 lotto diin kapin sa P20,000 ang iyang nadawat nga bahin sa dividendo.

Ang maong numero ra usab ang iyang gi-maintain sa pagpusta sa Ultra 6/58 lotto.