Trabaho alang sa mga biktima sa landslide

Patrabahuon sa Department of Labor and Employment (Dole) sa Central Visayas sud sa 30 ka adlaw ang mga trabahante nga apektado sa nahitabong landslide sa dakbayan sa Naga.

Matod ni Dole 7 regional director Johnson Cañete, usa ka miyembro sa matag pamilya ang makatrabaho pinaagi sa ilang Emergency Employment Program o Tulong Panghanapbuhay sa Ating Disadvantaged Workers (TUPAD).

Ang mo-qualify nga benepisyaryo modawat og P386 nga sweldo matag adlaw sud sa 30 ka adlaw.

Sigon ni Luchel Senarlo-Taniza, information officer sa Dole 7, ang sweldo madawat sa mga benepisyaryo sa higayon mahuman na ang proyekto.

Gawas nga sweldohan, sila i-enroll usab sa group micro-insurance sud sa usa ka tuig ubos sa Government Service Insurance System (GSIS) ug hatagan usab sa kagamitan nga kinahanglanon sa ilang trabaho ubos sa Personal Protective Equipment (PPEs) diin duna usab TUPAD shirts nga madawat.

Ang TUPAD, usa sa mga programa sa Dole 7ubos sa Integrated Livelihood and Emergency Employment Program, aron matabangan ang apektadong mga trabahante panahon nga dunay mga kalamidad sama sa baha, landslide ug bagyo.

Si Maria Grace Diaz, pangu sa Cebu Provincial Field Office (CPFO) sa Dole 7, nakiglambigit na sa mga representante sa Public Employment Service Office (PESO) sa kagamhanan sa siyudad sa Sugbo ug City Social Welfare and Development Office (CSWDO) alang sa profiling sa apektadong mga trabahante.

/ ALAN TANGCAWAN ■ GIPATIPAS: Gikubkob kini sa mga backhoe ang usa ka bahin sa Barangay Tina-an, Dakbayan sa Naga aron kaagian sa tubig sa sapa nga nasampungan sa landslide.