3 ka graduates sa kursong Medical Technology sa Sugbo mi-top sa board
Tulo ka buwan sa dili pa ang adlaw sa board examination, na-diagnose si Joanna Canen nga may depression ug naglisod sa iyang review.
Nagpatabang siya sa Ginuo ug hugot nga gisuportaan sa iyang pamilya ug mga higala.
maayong balita ang nadawat sa 20-anyos nga dalaga, gradwado sa Cebu Doctors’ University ug lumad nga taga siyudad sa Sugbo apan nibalhin og puyo ang pamilya sa dakbayan sa Iligan.
Si Joanna maoy top 8 sa Medical Technologist Licensure Examination nga gipahigayon sa Sugbo niadtong Septiyembre 22 ug 23 pinaagi sa iyang 89.90 percent rating.
Gawas niya, laing duha ka gradwado sa Velez College sa Sugbo ang naapil usab sa top 10 nga sila si Chris Jeram Lara sa ikapitong dapit nga may 90.40 porsyento nga rating ug Justin Riley Lam sa ikasiyam nga pwesto nga may 89.80 porsyento nga rating.
Si Joanna niangkon nga nasinati ang depression kay na-pressure siya sa umaabot nga board exam diin pipila na lang ka adlaw sa dili pa ang eksaminasyon, nag-breakdown siya.
Wa siya’y pagsalig sa kaugalingon ug sa matag tuon, mosud sa iyang hunahuna nga dili niya makaya.
Naiwit usab siya sa review sa iyang mga klasmeyt kay nibakasyon siya sa Dubai diin nagtrabaho ang iyang amahan isip aircraft technician.
Human sa unang adlaw sa exam, nihilak si Joanna ug wala nay gana nga mopadayon og tuon sa sunod adlaw nga exam tungod kay gilisdan sa pasulit, hinungdan nga nag-ampo siya sa Ginuo ug gisalig ang tanan, sa pagtuo nga dili siya biyaan.
“Believe in yourself. Naa ra gyud si God mo-help sa atua,” madasigon nga pulong ni Joanna dihang nahinabi sa Superbalita Cebu kagahapon, kinsa nangandoy nga mahimong doktor ug ikaduha sa tulo ka magsuon, kansang inahan usa ka rehistrado nga nars.