Pag-abli sa Larsian giuswag na sab: Herrera

Sa ikaduhang higayon, dili gihapon maablihan karong adlawa ang Larsian property, nga gipaubos sa Kapitolyo sa rehabilitasyon.

Subay niini, magpabilin una diha gawas sa propreidad, partikular na sa B. Rodriguez side ang mga stall owner sa sikat nga barbeque strip.

Niadtong Septiyembre 1 ang unang target sa tagdumala sa Larsian nga mabuksan kinig usab ngadto sa publiko apan wala kini nadayon sanglit wala pa nahuman ang rehabilitasyon niini.

Sa ikaduhang target nga mao ang Septiyembre 28, dili gihapon kini madayon kay matod ni Larsian administrator Joey Herrera, kinahanglan pang trabahuon ang parking lot niini ingun man ang linya sa tubig.

Matod ni Herrera, gipausab niya sa kontraktor ang parking lot design aron mabutngan kini ug rampa alang sa persons with disability (PWD) samtang mobalik uasb sila sa uno sa pag-instalar sa linya sa tubig alang sa 24 oras nga agas.

Base sa rekomendasyon sa Metropolitan Cebu Water District (MCWD), kinahanglang sa Chon HUa side magkuha sa ilang suplay sa tubig ang Larsian sanglit kusog ang pressure sa dapit kon itandis a kasamtangan nila nga source, nga anaa sa B. Rodriguez side.

Subay niini, mag-survey ug subling lihukon sa Larsian management ang paglukat ug mga permit alang niini gikan sa Cebu City Government.

Tungod sa dugang trabaho, gipadayag ni Herrera nga posibleng malangay pa ug laing duha ka semana ang subling pagbukas sa Larsian.

Nahibalo na hinuon ang mga tenants niini. Sa pagka-karon, duna nay 48 ka mga stall diha sa Larsian barbeque strip.