Feasibility study sa trans-axial highway

Gihangyo sa nagpasiugda sa plano nga Cebu Transaxial Development Project (CTDP) ang tanang kongresista sa Sugbo nga tabangan sila sa paghimo nga hingpit nga feasibility study sa 300-kilometros nga four-lanenga dan.

Atol sa pre-feasibility study niini niadtong 2013, niabot sa P10 ngadto sa P12 milyones ang kantidad. Apan kon himuon ang feasibility study niini karon, maabot na sa kapin P50 milyones ang magasto.

Matod ni Gigi Sanchez kanhi Cebu Provincial Board Member ug karon Capitol consultant nga dili lang makasulbad ang maong proyekto sa problema sa trapiko apan makahatag usab kini og kalambuan sa lagyo nga dapit sa lalawigan sa Sugbo.

Ang maong trans-axial highway anaa kini gitas-on nga gikan sa mainland Santander paingon sa Daanbantayan sa norte.

Sa 300-kilometros niini, 220 niini ang existing roads, samtang laing 80-kilometros mga bag-o kini nga road links.

Ang kagamhanan sa probinsiya sa Sugbo makig-partner sa usa ka private financing alang sa maong proyekto.

Ang CTDP, nga mao ang private investor, mao ang momanage sa expressway sulod sa 25 ka tuig.

Matod ni Engr. Edgar Sibonga, usa usab ka consultant sa lalawigan sa Sugbo nga kon himuon ang maong expressway karon, mokantidad na kini og P120 bilyones gikan sa P80 bilyones niadtong 2013.

Tungod kay private public partnership kini, aduna na unya kini’y toll fee.

Si Cebu Vice Governor Agnes Magpale, sa iyang bahin, nagkanayon nga dili pa uwahi ang maong proyekto sa pag-implementar niini.

Pinaagi sa maoing proyekto, makahatag kini og mas mubo nga oras sa biyahe hilabi na sa turista gikan sa norte ug habagatan ug pabalik, agi sa tungatunga sa kabukiran sa isla sa Sugbo.