Shootout o rubout?
Mas daghan pang mga pangutana kay sa tubag sa nahitabong engkuwentro tali sa mga armadong tawo ug mga pulis sa sitio St. Michael, barangay Pajac, Lapu-Lapu City niadtong miaging adlaw. Pito ka mga tawo ang napatay nga matod pa responsable sa mga pagpanulis ug pagpatay sa dakbayan sa nangaging mga adlaw. Nahilambigit usab sila sa illegal nga drugas ug gun for hire. Matod pa ang mga pulis miadto sa maong lugar aron pagsusi sa presensiya sa mga armadong tawo human sila pahibaw-a sa mga nagpakabanang mga lumolupyo.
Pag-abot sa mga pulis, gipabuthan ug gipamusil sila sa mga armadong tawo nga diha sulod sa usa ka payag. Ug dayon nahitabo ang pinusilay. Patay
ang pito ug ang ilang lawas nagbuy-od sa nagkalain-lain lugar human sila mi-aksiyon og sibat. Nakuhaan sila og nagkalain-laing kalibre sa armas de fuego. Matod pa sa mga awtoridad nga local boys ra sila ug posible nga adunay koneksiyon sa laing organized criminal group.
Matod pa ang mga membro niini maoy nipatay sa usa ka estudyante sa usa ka aeronautic school sa dakbayan ug usa ka
security guard sa miaging semana. Napasakaan na ba sila og kaso o aduna bay mi-ila kanila? Bisan kon adunay mitumbok kanila apan suspetsado pa an. Nagkanayon ang kapulisan nga usa ka legitimate operation ang maong shootout. Mao man gyud na ang kasagaran nilang
version nga legitimate operation bisan kuwestiyonable usahay.
Kon mga local, natural aduna gyud silay mga pamilya ug balay. Apan nganong nagka-grupo man sila sa maong usa ka balay sa sitio St. Michael? Kay aduna silay plano nga mohimo og krimen? Nagkanayon ang mga silingan nga talagsa ra makita ang maong mga tawo sa maong lugar. Sa ato, wala sila magpuyo didto. Ang pangutana lagi nganong nagkatapok man sila didto?
Di lang ta dayon molamoy sa version sa kapulisan kay daghang mga hitabo nga naghimo-himo sila og estorya.
Well, ato lang silang hatagan og ‘benefit of the doubt’. Mas maayo siguro nga ang mga kabanay modangop ngadto sa Commission on Human Rights (CHR) aron ma-imbestigahan ug molutaw ang matuod, kon
shootout ba gyud o rubout? (bobbygnalzaro@gmail.com)