May buhi pa ba sa natabunan sa yuta?

Miawop na ang paglaum nga duna pay buhi niadtong natabonan sa pagdahili sa usa ka bahin sa bungtod didto sa sitio Sindulan, Barangay Tinaan, syudad sa Naga niadtong miaging Huwebes, Septyembre 20.

Si Baltazar Tribunalo Jr., pangulo sa Cebu Provincial Disaster Risk Reduction and Management Office (PDRRMO), niingon nga naglaum sila nga duna pay timailhan nga duna pay buhi, signs of life, didto sa nahitaboan sa pagdahili sa yuta.

Apan ang ikatulong assessment sa ilang Quick Response Team (QRT) sa lugar sa landslide wa na magpakita og signs of life. Ning higayona, kapin na sa usa ka semana gikan sa pagdahili sa yuta, milagro na lang kon duna pay buhi sa maong dapit.

Busa ang mga rescuers sugod kagahapon nibalhin na gikan sa search and rescue operations ngadto sa search and retrieval operations aron madali ang pag-ugkat sa mga lawas niadtong natabonan sa yuta ug mga dagkong bato.

Si Tribunalo ug si Mayor Kristine Vanessa Chiong sa syudad sa Naga nagkasabot nga himuon nang retrieval operations samtang nagkagamay ang kahigayunan nga dunay survivors nga makuha sa landslide area.

Hangtod kaniadtong Miyerkoles sa hapon, 64 na ang natala nga nangamatay, 18 ang angol ug 28 pa ang missing. Matod pa ni Tribunalo ilang gipaninguha nga mopaspas ang pagkuha sa mga lawas kay retrieval na ang ilang buhaton ug pagproseso sa mga patay.

Ang gipunting karon sa mga opisyales sa kagamhanabg lokal ug nasyonal mao ang pag-atiman sa mga tawo nga napugos sa pagbakwit gikan sa ilang tagsa-tagsa ka mga pinuy-an tungod sa risgo sa laing pagdahili sa yuta.

Tungod sa kadaghan sa atong mga kaigsuonan nga malumo og kasing-kasing, nagbaha ang hinabang alang sa mga bakwit. Apan nihangyo ang Department of Social Welfare and Development (DSWD) sa publiko nga unta di nila ilakip og donate kadtong mga butang nga di na magamit. Ayaw na tawon anang used clothing, labi pag underwear.

Si DSWD 7 Regional Director Evelyn Macapobre niingon nga ang mga bakwt nagkinahanglan gawas sa pagkaon og mga hygiene kits, gatas, school supplies, habol, banig, unlan, diapers, underwear, ECO bags ug dagko nga plastic boxes.

Ning higayona, kapin na sa usa ka semana gikan sa pagdahili sa yuta, milagro na lang kon duna pay buhi sa maong dapit.”