Pelikula ni Bea ug Aga hapit na isalida

Usa sa mga timailhan nga duol na ang bag-ong tuig ug ang Pista Senyor mao ang pahibalo sa Cebu Arts Foundation Inc. bahin sa deadline sa ilang pagdawat sa mga salmot sa 39th Cebu Popular Music Festival, ang bangga sa paghimog kanta nga Cebuano.

Karon nang Dominggo, Sept. 30, ang deadline. Sa ato pa, may igong panahon pa sa pagsumitir sa inyong mga salmot sa bisan asa nga kategoriya sama sa (1) Awit sa Gugma (love song: pop/ballad genre), (2) Huni sa Kasingkasing (love song: other genre) ug (3) Awit sa Pagpakabana (songs with social relevance, upbeat genre).

Bisan karong Dominggo ang deadline (kana kon way paguswag nga mahitabo), sa Enero 18, 2019 pa ang grand finals isip usa sa mga dagkong kalihukan sa kapistahan ni Senyor Santo Niño.

Dagkong ganti ang nagpaabot sa mga palarang mananaug.

Pagka way swerte. Motan-aw na unta ko sa The Hows of Us adtong Lunes gamit ang pases nga hinatag sa Star Cinema. Unsa ba nga wa man ni gidawat kay nakaabot na kuno sa maximum number ang mga pases nga nadawat sa sinehan.

Kon nahibaw-an pa, mao na lang unta to ang akong gitan-aw ginamit ang akong ‘dual citizenship card.’

Ang The Predator maoy akong gipili kay nagsalig nga naay pases alang sa The Hows of Us. Wa ko malingaw. Apil ko sa mga nagnganga nga nihagok. Haha! Ayaw pagbuot!

Samtang nangandoy pa si Lea Salonga nga mabanhaw ang ilang panagpares ni Aga Muhlach sa pelikula (‘tamang script, tamang direktor’ ug uban pang tama, matud ni Lea), si kumareng Bea Alonzo (kumare yud?) nagpanikad na nga ipasalida ang ilang unang panagpares ni Aga.

Ang istorya mahitungod sa usa ka romantikong magpapatigayon (Aga) ug usa ka maniniyot (photographer nga si Bea, si kinsa pa man diay?) nga dunay sakit sa kasingkasing. Pila ka mga esena didto gi-syut sa Vancouver, Canada.

Ang direktor sa First Love mao si Paul Soriano. Kauban dinhi sila si Sandy Andolong, Albie Casiño ug uban pa. Hinimo kini ubos sa Ten17 Productions, Star Cinema ug Viva Films.

Isalida kini sugod sa Okt. 17. Takilid na sab ta ani (kon ang pases di na sab dawaton, paet!).