Mangulata kon mahubog

Dear Papa Joe,

Tawga lang ko og Martha, 33 ang pangedaron. Duna koy ka live-in at the same time duna sab koy uyab nga foreigner. Pero naka realize kong sayop ang akong gibuhat maong akong gibuwagan ang foreigner ug ni focus na lang ko sa akong ka live-in. Pero kon mahubog akong ka live-in, kusog kaayo mangulata. Last nga nahitabo, ako siyang giapas sa tindahan nga nag-inom kauban sa among mga silingan nga palahubog sab kay mangayo kog kwarta para palit og softdrinks. Pero unsa ba nga iya man kong gisagpa og kusog kaayo, unya pagkahuman iya kong gilambuyog. Nalagpot ko kay gamayon baya kong pagka babaye.

Ingon ani gyud iyang batasan kon mahubog, mangulata. Mao pod ni hinungdan nga nag iring-iring kog foreigner kay mamun-og lagi siya nako. Unsa kahay akong buhaton, ako na lang kaha ni biyaan akong ka live-in ug balikan akong foreigner? Palihug tambagi ko.

MARTHA

Dear Martha,

Sa ginaingon na nga mogawas ang tinuod nga gibati sa usa ka tawo kon mahubog. Dili kaha duna na kay history sa una nga nakapasuko sa imong ka live-in ug mapagawas lang ni kon siya mahubog? Basin og nakahibawo siya about sa imong foreigner ug ang iyang kalagot mapagawas kon mahubog siya maong iya kang gisagpa ug gilambuyog.

Ang maayo siguro nimong buhaton mao ang paghatag og bili sa imong kaugalingon. Di question kon kinsay imong pilion sa duha, ang ka live-in ba nimo or ang foreigner. Kay di ra ba gyud ka makasiguro sa tawo, duna pod baya foreigner nga mangulata.

Kon gusto gyud kag kapares sa imong life, pangita og lalake nga tinuod nga magmahal ug mag pangga nimo. Pag ampo sa Ginuo nga hatagan kag lalake nga para nimo. Kana lang ug daghang salamat.

PAPA JOE

(Sa inyong mga problema, ipadala lang sa papajoesuperb@gmail.com)