When I feel this way
Samtang nagkaon mi si Juvey, kanunay siyang motan-aw nako. Mora na nuog di ko komportable sa among panag-uban ron. “Naibog ka nako, no, Juvs?” Gilingaw ko na lang ang akong kaugalingon sa pagkumedya kang Juvey. Puwerteng katawa niya ug iya kong nahapak sa akong bukton.
“Pag-sure, uy, Belle. Nganong maibog man ko nimo nga parehas man tang girl?”
Nagpahiku-hiko sa lawas si Juvey. Nahimuot gyud ko niya. Mikatawa sab kog kusog.
“Kuan man gud, sige man kag tan-aw nako.”
“Siyempre kay giguwapahan man gyud ko nimo? Let’s say, nga nangandoy ko nga maparehas nimo kaguwapa.”
Mikidhat pa ang kanahan nako. Nakapanglingo na lang ko dayon kong inom sa akong pineapple juice.
“Kon laki pa sab ko ron, Juvs, mangandoy sab ko nga maparehas kaguwapo nimo.”
“Yamat, giguwapohan diay ka nako, Belle?”
“Oo, uy. Tinuod man sab nga handsome ka.”
“Haayy! Sayang, no, nga nabayot ko, Belle?”
“Di man sayang, Juvs, kay kini man ang gihatag sa Ginoo nimo. Kon unsay ihatag sa Diyos nato, dawaton nato ni sa kinasingkasing, ug atong mahalon ug ampingan.” “Aw, korek gyud ka ana, Belle.” “Tuod diay, Juvs, nganong di man kauban nimo ron si Suzy? Nakahibawo ba siya nga mag-lunch ta ron dinhi?”
Nakahinumdom ko sa akong childhood friend.
“Nakahibawo, uy, Belle. Gisultihan ko man siya pero wa makakuyog nako kay naglain ang paminaw sa lawas.”
Igo na lang kong miyangu-yango. Pagkahuman namog pangaon, nanggawas na mi sa fast food. Nagkasabot mi nga manan-aw og sine. Komportable ko nga mikuyog kang Juvey kay di man siya angay kabalak-an kay bayot man siya. Sa balcony mi manglingkod. Lovestory ang salida nga among gitan-aw.
“Nindota gyud moda’a anang Jericho, uy, Belle.”
“Bitaw,. Paborito ko siyang artista.”
Si Jericho ang bida nga lalaki sa salida nga among gitan-aw ni Juvey. Unya misandig ko sa abaga ni Juvey.
“Okey lang nimo, Juvs?” “Aw, sige lang gud. Parehas bitaw tang girl. No malice.” “Bitaw.” Mubo kong tubag. Unya namatikdan nako nga giagbayan ko ni Juvey. “Okey lang nimo, Belle?” “Aw, sige gud. No malice bitaw kay parehas man tang babaye.”
Malipayon mi si Juvey nga nanggawas sa sinehan pagkahuman sa salida. (SUMPAYAN)