Mobalik ako sa atong baybayon

Mitaob na ang dagat ug nia na si Rizalina sa may pangpang aron pagtan-aw sa dagat nga mitaob na. Ning iyang pag-anhi dinhi segurado gayud nga kasaban na sad siya unya sa iyang Mama Lucrecia, kay dili gusto ang iyang mama nga mahinumdom siya sa gidangatan sa lalakeng iyang gihigugma. Si Hipolto ang lalakeng iyang gihigugma. Iya na ganing gikatugyan ngadto niini ang kaputli sa iyang pagka bulak. Apan sa matag hapon nga sila mag-abot dinhi sa baybayon sa ilang balangay, ingon sa bation nila sa usag usa ang kahadlok, nga basin og dunay makakita kanila dinhi sa pangpang ug mosumbong sa iyang Papa Gumer. Si papa niya Gumer ug ang amahan ni Hipolito hugot nga magkaaway. May nahitabo na nga engkuwentro tali sa duruha niadtong mga ulitawo pa sila. Hangtod karon nga mga minyo na sila nagdumtanay gihapon ug nasakripisyo ang ilang gugma ni Hipolito.

“Riz, mobiya ko dinhi sa ato,” matod ni Hipolito sa hinay nga tingog usa ka hapon niana.

“Ha? Ikaw mobiya? Ngano man, Pol?” ingon sa dihay hait nga talinggab nga mitagdoy sa dughan sa dalaga.

“Aron wala nay kasamok sa tagsa-tagsa nato ka pamilya. Apan mobalik ko dinhi, Riz,” ni Hipolito nga mikupot sa kamot sa dalaga.

“Balik gyud baya dinhi, Pol, ha? Dinhi nato idugtong ang kutay sa atong pagminahalay, dinhi ning baybayon,” kahilakon si Rizalina nga namulong.

Mao kadto ang hapon sa pagpananghid ni Hipolito ka- niya. Dugay na kadto, apan wala gyud mawagtang sa iyang kasingkasing ang ulitawo. Kanunay kini niyang giampo matag gabii sa dili pa siya matulog.

USA ka hapon nakahukom si Rizalina nga modalikyat sa baybayon Didto sa puting bunbon may nakita siyang usa ka tawo nga nagbuy-od ug wala nay kinabuhi. Iyang gisusi ug iyang nakita si Hipolito nga patay na. Ang usa ka kamot niini may gikumkom nga usa ka sulat. Iyang gibasa, “Rizalina, nia mibalik ko. Sama sa giingon ko sa atong mga panumpa, anhi ko magpakamatay dinhi sa atong baybayon!”

Gigakos ni Rizalina ang binuhat nga dugay na niyang gipaabot human sa taas nga panahon. Ug karon mihilak siya. Ang iyang mga luha didto motulo sa dughan ni Hipolito. Samtang naggakos siya kang Hipolito may kusog nga hampak sa mga balod ug nangabasa silang duha. Natumba si Rizalina tupad sa patayng lawas sa lalakeng iyang gihigugma kinsa mituman sa panaad nga mobalik siya dinhi sa abutanan nilang baybayon. (KATAPUSAN)