Team Fajardo vs. Team Tallo sa Cesafi All-Star
Mga duwa karon
5:15 pm- USC
batok CEC (high school) 6:45 pm- SWU
batok UV (high school)
Adunay kausaban kabahin sa pagpili og mga magduduwa nga mopakita og aksyon sa 2018 Cebu Schools Athletic Foundation Inc. (CESAFI) All-Star Game nga gikatakda karong Oktubre 14 sa Cebu Coliseum.
Nagkanayon si Commissioner Felix Tiukinhoy Jr. nga ning tuiga, ilahang gibasi ang pagpahigayon sa kalihukan sa kausaban nga gihimo sa All-Star Game sa NBA sa miaging season.
Ang NBA niwagtang sa naandang West vs. East format ug ginganlan niini ang All-Star teams sa labing sikat nga magduduwa sa Eastern Conference ug Western Conference.
Imbes nga puwersa sa West ginganlan na og Team Stephen nga nagtumbok kang Golden State Warriors superstar Stephen Curry samtang ang East ginganlan og Team LeBron nga nagtumbok sa kanhi pambato sa Cleveland Cavaliers nga si LeBron James.
Sa Cesafi, ang All-Star teams gipangalan sa mga magduduwa nga gikan sa liga nga nakakulit na og dakong pangalan sa tibuok Pilipinas.
Sa college division, ang AllStar teams gipanganlan og Team Fajardo nga nagtumbok kang JuneMar Fajardo sa San Miguel Beermen ug Team Slaughter nga nagtumbok kang Greg Slaughter sa Brgy. Ginebra Gin Kings.
Sa high school division, ang All-Star teams ginganlan og Team Desiderio nga nagtumbok sa pambato sa UP Fighting Maroons sa UAAP nga si Paul Desiderio ug Team Tallo nga nagtumbok kang NLEX Road Warriors guard MacMac Tallo.
Ang mga coach nga modala sa All-Star teams magpulipuli sa pagpili og mga magduduwa hangtod nga makompleto nila ang ilang tagsatagsa ka line-up.
Mohatag og dugang kolor sa kalihukan mao ang naandang Slamdunk Contest ug ThreePoint Shootout.
Sa laing bahin, magpadayon ang aksyon sa torneyo karong adlawa.