GUIAO GISUGAT OG KADAUGAN NLEX mipakgang sa Blackwater; Fonacier nangulo

Gisugat og kadaugan ang paghibalik ni Team Pilipinas coach Yeng Guiao sa NLEX Warriors human nila mansahi ang limpiyong record sa Blackwater, 124106, niadtong Miyerkules sa nagpadayon nga PBA Governor’s Cup sa Araneta Coliseum.

Ang beteranong si Larry Fonacier ang nahimong mahait nga hinagiban alang sa Warriors human kini mipabaha og 24 puntos aron giyahan ang Warriors ngadto sa kadaugan nga maoy ilang ikaupat nga daog sa unom ka duwa.

Kadto maoy una usab nga higayon ni coach Yeng Guiao sa pagdumala sa team human sa iyang mission uban sa Team Pilipinas sa Asian Games ug sa ikaduhang hutong sa Fiba World Cup Asian Qualifiers.

Ang Blackwater, nga miduwa niadtong Miyerkules nga wala an gilang pambato nga si Poy Erram, nahagsa sa 4-1 nga baraha nga naghatag sa Phoenix (5-1) alang sa solong liderato.

“Matagal tagal kaming naghanda nung nakita namin na

this team is really for real so we made sure that we were prepared for this game,” matod ni Guiao nga nakuhaan og pamahayag sa Spin. ph.

Mipabuhagay si Fonacier og unom sa iyang walo ka itsa sa three-point area nga maoy pinakanindot niyang performance ubos sa NLEX uniform. Sa laing duwa, ang Magnolia Hotshots way kaluoy nga miwatakwatak sa Rain or Shine Elasto Painters, 92-76.

Nakabawi ang Hotshots sa ilang kapildihan sa mga kamot sa Phoenix niadtong Dominggo ug mipausbaw sa ilang record, 3-1, samtang nagduot sa Elasto Painters, 0-2.