MELINDO ANDAM UG MALAUMON

Andam, sakto sa preparasyon ug nagpanikad na si kanhi world champion Milan “El Metodico” Melindo alang sa iyang world title fight karong Dominggo batok ni International Boxing Federation (IBF) Light Flyweight champion Ken Shiro didto sa Yokohama, Japan.

Atol sa press conference kagahapon nga gipahigayon sa Summit Circle Inn sa Fuente Osmena dakbayan sa Sugbo, si Melindo (37-3, 13KOs) mipadayag nga sukwahi sa mga nangagi niyang mga away, wala siya makasinati og problema sa iyang timbang karon.

“Honestly, wa ko maglisod sa timbang karon kay gradual man ang pagpa-reduce unya taodtaod sab ko nga nag-ensayo. Nalipay lang sab ko nga akon maoy gipili nila nga challenger. Siguro ilang nakita nga molahutay man gyud ko og 12 ka round, mao siguro nga gusto sila nga ma-entertain ug maayo,” matod ni Melindo.

Ang trainer ni Melindo nga si Edmund Villamor mipadayag nga dako ang iyang pagtuo nga malangkatan ni Milan (Melindo) ug titulo sa Shiro kinsa aduna pa lay 13 ka daog, walay pildi ug pito ka knockout.

Iyang gisaysay nga nakakita na sila sa estelo ni Shiro ug ila na usab kini nga naistudyohan. “Among plano, mag-counter

puncher mi. Mosud man sab ni siya, so kini maoy among atngan. Hinuon kamao sab ni siya modagan-dagan,” nagkanayon si Villamor.

“Siguro maayo man tag gipakita sa atong miaging away, basin usa na sa rason nganong kitay gipili. Pero lisod gyud nuon ning kitay mosulong,” dugang sa kanhi WBO champion.

Kini maoy unang away ni Melindo sukad sa iyang pagkapukan sa unification bout ni IBF champion Ryoichi Taguchi niadtong Disyembre.

Si Melindo, 30, uban sa iyang coaching staff nga sila si Edito ug Edmund Villamor mogikan paingon sa Japan karong Lunes.

Sa pagkakaron, si Melindo mosubra pa og pito ka libras sa iyang timbang apan alang kaniya dili kini problema ug dali ra kini niyang kuhaon atol sa away.

Sa iyang bahin, si Edito Villamor mipasabot wala kaayo sila motutok sa sparring session ni Melindo tungod kay ilang gihatagan og igong pagtagad ang estelo sa ilang kontra. “Siguro almost 100 ka sparring na ang atong nahimo,

pero our focus is more on sa

style sa kontra. And I think, ang speed ni Melindo is still

there. Wa ni maapektohi kay dugaydugay na man sab ni siya nga nagpraktis,” dugang ni Edito Villamor.

Ang 26 anyos nga Shiro kanhi usab OPBF Light Flyweight champion, kanhi Light flyweight king sa Japan ug kanhi kampion usab sa WBC Youth World Light Flyweight division. Base sa Boxrec.com. si Shiro kadaghan na usab makaaway og mga beteranong boksidor sama kang Melindo.

/ HULAGWAY NI JUN MIGALLEN ■ANDAM NA MI..: Malaumon ug positibo ang kampo ni kanhi world champion Milan “El Metodico” Melindo, tunga, sa dihang mosuway sila paglabni sa WBC Light Flyweight title sa Haponanon nga si Ken Shiro karong Dominggo didto sa Yokohama, Japan. Uban ni Melindo mao ang ambungan nga magsuong trainers/seconds nga sila si Edito, tuo, ug Edmund, wala, Villamor.