DEADLINE UGMA SA PASADA CARDS; KUHAA NA: LTFRB
Hinay ang turnout sa giapudapod nga fuel subsidy cards sa kagamhanan ngadto sa mga operator og public utility jeepneys (PUJ) sa Sugbo, paghulagway sa labing taas nga opisyal sa Land Transportation Franchising and Regulatory Board (LTFRB) sa (LTFRB) sa Central Visayas.
Gibanabana ni LTFRB 7 Director Eduardo Montealto nga 28 porsyento pa lang sa kapin 5,000 ka Pantawid Pasada Program cards ang gikuha sa operators.
Duha ka mga rason ang nakita sa director kon nganong dili pa daghan ang nanguha sa ilang fuel subsidy cards nga matag usa dunay sud nga P5,000.
Una, ang ubang cards ang pangan pa sa mga kanhi nanag-iya sa mga prangkisa sa PUJ units ang naa sa ilang talaan ug di ang pangan sa bag-ong mga tag-iya nga maoy nakapalit.
Siya nipasabot kon kinsa ang pangan nga natala sa ilang buhatan mao ra usab kini ang makakuha sa mga card.
Ikaduhang rason, nagtuo si Montealto nga hayan ang ubang operators anugonan mohunong og pamasada sud sa usa ka adlaw aron pagproseso sa gikinahanglan nga mga dokumento sa pagkuha sa Pantawid Pasada cards.
Kagahapon, mao unta ang adlaw sa gihatag nga tagal sa LTFRB 7 sa mga operator nga naapil sa unang batch sa pagkuha sa mga card.
Apan gilugwayan kini hangtod sa Lunes human way nahimo nga transaksyon ang rehiyonal nga buhatan sa LTFRB 7 tungod kay nasinati ang brownout sa maong ahensiya niadtong Huwebes, gikan sa alas 5:45 sa buntag hangtod sa alas 4:45 sa hapon.
“Daghan unta ang niari pagfill up sa claim forms pero wa tay nahimo nga transaksyon kay nag-blackout sa office,” sigon ni Montealto dihang nahinabi sa Superbalita Cebu niadtong Biyernes.
Hangtod niadtong Huwebes, 1,537 pa lang gikan sa 5,354 ka cards nga unang batch nga nadawat sa LTFRB 7 sa katapusang semana niadtong Agusto ning tuiga, ang nakuha sa mga PUJ operator sa Sugbo.
Niadtong Biyernes, giapudapod ang 325 ka cards nga apil sa first batch sa lalawigan sa Bohol.
Giklaro ni Montealto nga madawat gihapon sa operator sa unang batch ang mga card sa sunod semana, apan di na kini maoy prayoridad sa distribusyon sanglit gilaoman nga sa sunod semana usab moabot ang gibanabanang 7,000 ka cards nga apil sa ikaduhang batch.
Apil na dinhi ang 40 sa Siquijor ug wa kaabot sa 100 sa Negros Oriental. Moabot sa 12,000 ang mga benepisyaryo sa fuel assistance sa Central Visayas.
Gidugang niya nga kasagaran sa mga operator nga maapil sa 2nd batch ang mga miyembro og kooperatiba sama sa Cebu Integrated Transport Service MultiPurpose Cooperative (Citrasco) ug Visayas United Drivers Transport Service Cooperative (Vudtrasco).
Hangtod sa Disyembre 31 nga balido ang P5,000 nga sud sa fuel subsidy cards nga magamit sa pagpatubil sa awtorisado nga gasoline stations.
Sigon ni Montealto, sa matag cash card, nakaimprinta ang plate number ug kini kinahanglan nga tan-awon sa attendant sa gas station ug itandi sa plate number nga makita sa PUJ sa di pa magamit sa pagpatubil.
Sa sunod tuig, i-renew ang card pinaagi sa Land Bank of the Philippines diin moabot sa P20,000 ang gipaabot nga madawat nga fuel assistance sa mga operator. /