MISIS GIPATAY; BANA GAHIKOG

RETIRED COAST GUARD GIHULAGWAY NGA BAYOLENTE

■TUNGOD SA SELOS: Gialsa ang lawas ni Aldrin Cabo human kini makuha sud sa usa ka lawak sa balay sa iyang ugangan sa Barangay Inayawan, Dakbayan sa Sugbo. Si Aldrin mipusil patay sa iyang asawa nga si Gina, kinsa nibiya sa balay tungod sa giingong pagpangulata niya kon mahubog. Human niya mapatay ang iyang asawa, siya usab nagpusil sa kaugalingon. Ang magtiayon patay na pulos dihang naabtan sa kapulisan nga gialarma. Unsay gibasehan sa selos?

“Buhi pa ka, Gina? Tingog, kon buhi pa ka!”

Mao kini ang nadungog sa inahan sa biktima nga si Gina Cabo dihang gipusil sa iyang bana niadtong Biyernes sa sa gabii sa Sitio Iza, Barangay Inayawan, dakbayan sa Sugbo.

Ang 48-anyos nga inahan sa duha ka mga anak, naligo sa iyang kaugalingong dugo human gipusil ni Adrin Cabo Sr., 48, kinsa residente sa silingang sitio sa Kaluwasan, Inayawan.

Sa pakisusi sa Pardo Police Station, nasayran nga usa ka retired Philippine Coast Guard officer si Aldrin. Human niya patya iyang asawa, naghikog usab siya.

Pasado alang 9 sa gabii niadtong Biyernes dihang niadto sa balay sa ginikanan ni Gina si Aldrin nga hubog ug adunay dala nga .45 kalibre nga pistola.

Base usab sa kapulisan ug sa datus sa barangay, nagkasumpaki na ang duha niadto pa lang Agusto ning tuiga.

Agusto 19 dihang nangayo og Barangay Protection Order si Gina gikan sa Barangay Inayawan tungod sa rason nga financial, emotional, psychological, ug physical violence.

Dihang nisulod sa balay sa iyang ugangan si Aldrin, nanuktok kini sa kwarto ni Gina apan nagkalalis ang duha ug didto na gipusil ni Aldrin sa makadaghang mga higayon ang iyang asawa.

Si Gina nakaangkon og lima ka mga samad pinusilan sa luyo nga bahin sa iyang lawas.

Ang inahan ni Gina nga nakadungog sa buto-buto, nakadungog sa maong pulong diin nag-panic siya ug nigawas sa ilang balay.

Dihang nakaabot kini gawas sa gate, nakadungog na usab kini og laing buto diin mao na kadto ang buto nga nagkutlo si Aldrin sa iyang kinabuhi.

Nakaangkon kini og samad pinusilan sa iyang ulo.

Dihang naabot ang Emergency Medical Services (EMS) sa dapit, wa na’y kinabuhi ang duha nga parehong naligo sa ilang dugo.

Selos ang giingong gitan-aw karon nga rason sa pagpusil patay ni Aldrin sa iyang asawa.

Apan base sa BPO nga gipangayo niini sa Barangay Inayawan, daw bayolente kini si Aldrin kang Gina.

Matod ni Chief Insp. Regino Maramag, hepe sa Pardo police station nga ang unang alarma nga ilang nadawat gi-hostage sa bana ang iyang asawa sa sulod sa balay sa ginikanan sa babaye.

Apan sa pag-abot nila sa lugar, patay na ang duha diin ang asawa nakaangkon og lima ka mga samad pinusilan sa likod nga bahin usa niini sa buko-buko.

Human niya mapatay ang iyang asawa, gi um-um niini ang iyang armas ug gikablit nga milapos ang bala sa luyong bahin sa ulo niini.

Giingong dugay na nga nag away ang magtiayon kay giingong kulatahon ang asawa panahon nga mahubog ang bana.

Nakahukom si Gina nga magbuwag nalang usa ka buwan na ang nakalabay.

Apan niadtong miaging adlaw, nagpadala matod pa kinig text nga magpakamatay kini apilon niya ang asawa. “Dugay nana sila nga naay

conflict kay palahubog nana kaayo iyang bana. Ang babaye gusto na makig buwag sa bana ba. Ang bana dili ganahan, mao to gabii miadto sa balay gipusil diretso ang asawa nya nag pusil pud ang bana sa baba,” matod ni Maramag sa Superbalita Cebu.

Sa imbestigasyon sa kapulisan, way laing gikarelasyon si Gina bisan sa pagduda sa bana nga aduna kini laing lalake sigun sa sulti sa mga silingan sa lugar.

Naa na sa PNP Scene on the Crime Operation (SOCO) ang armas nga gigamit sa krimen ug sutaon pa kon kini rehistrado ba.

Tungod kay patay na ang suspek, gisirad-an na sa kapulisan sa Pardo ang ilang imbestigasyon. /