Hagbay ra unta i-demolish

Niadtong 2009 pa lang, nihangyo na ang Apo Land and Quarry Corp. nga ipaguba ang mga balay sa Sitio Sindulan, Barangay Tina-an, siyudad sa Naga.

Apan tungod sa pamulitika, wa kini mahitabo, pag-angkon ni kanhi City of Naga mayor Valdemar “Val” Chiong.

“Namolitika man ko atong higayona kay hapit na election... Sa tinuoray lang, niadtong higayona, ninghangyo man ang mga taw, ako man ang giduol. Nanghangyo lang ko sa Apo. Ninghangyo sila na hangyuon ang Apo na, ‘Mayor, di lang mi i-demolish’,” asoy niya dihang nahinabi sa sibyaanang dySS Super Radyo Cebu kagahapon.

Matod niya, nga tungod kay sud na sa pipila ka tuig nga nag-operate sa siyudad ang ALQC, wa siya magdahom nga dunay mahitabo nga kalamidad sama sa makalilisang nga landslide niadtong Septiyembre 20 diin 72 ang patay.

“Duna nay notice of demolition kanang nagpuyo gani sa Sindulan. Sad-an tingay ko kay ako man gihangyo ang Apo nga ayaw nalang. Mao to nibiya sila anang lugara, ila naman gani nang gisugdan og tree planting. Ningadto sila sa unahan gamay kay tungod nihangyo ta kay nihangyo man sad ang mga taw. Kabalo ana ang mga taga-Sindulan nga demolison sila unya nanghangyo ta,” dugang ni Val.

Apan iyang giklaro nga ang kaso lahi sa paglabay sa siyam ka tuig. “Sa first term ni (incumbent Mayor) Kristine (Vanessa Chiong), wala gyud miingon sila nga i-evacuate nang lugara,” siya namulong.

Samtang, magpadayon ang search and retrieval operations, pahibawo ni Baltazar Tribunalo, pangu sa Provincial Disaster Risk Reduction and Management Office (PDRRMO) ug incident commander.

“Dili pa, Mam, combate pa ta ani,” tubag ni Tribunalo sa text message sa Superbalita Cebu kon ihunong na ba ang search and retrieval operations.