Pagpanglangyaw sa mga magtutudlo napugngan

Napugngan na sa Department of Education (DepEd) ang paglangyaw sa lisensiyadong mga magtutudlo ngadto sa laing mga nasod aron manarbaho, ang uban isip domestic helpers.

Matod ni Education Undersecretary Tonisito Umali nga daghan na sa mga magtutudlo nga mga overseas Filipino workers (OFWs) ang namalik na dinhi sa Pilipinas gumikan sa sweldo nga ilang gitanyag.

“Napipigilan na po natin ‘yan dahil ‘yung sweldo po ng ating mga kaguroan ngayon po sa ating bansa ay hindi naman po basta basta matatalo,” sumala sa undersecretary nga nibisita sa buhatan sa SunStar Cebu niadtong Huwebes sa gabii.

Pinaagi sa ilang programa nga “Sa Pinas Ikaw Ang Ma’am at Sir (SPIMS),” gidasig nila ang mga magtutudlo nga kanhi nanarbaho isip domestic helpers sa ubang mga nasod nga mobalik sa nasod ug magtudlo sa mga publikong tunghaan.

Base sa website sa National Reintegration Center for Overseas Filipino Workers (OFWs) sa Department of Labor and Employment (Dole) gikan sa 2014 hangtod sa Enero 30, 2018, miabot na og 846 ka mga benepisyaryo sa SPIMS ang aktibo nang nagtudlo sa 749 ka mga tunghaan sa tibuok nasod.

Si Umali namahayag nga bisan og wala maumentohi ang suhulan sa mga magtutudlo sama sa kapulisan ug military, wala kini magpasabot nga wa na usab magtagad ang gobiyerno nila.

Siya niingon nga dili na kabentahaan ang sweldo nga madawat sa mga magtutudlo dinhi sa nasod.

Moabot sa P20,179 ang take home pay sa usa ka bag-ong magtutudlo nga ubos sa Salary Grade 1 ug kini exempted sa income tax ubos sa Tax Reform for Acceleration and Inclusion (Train) Law kay wala moabot sa P250,000 nga buhisan sa gobiyerno.

Ang mga Teacher II kay P22,149 ang sweldo; P24,200 kon Teacher III; ug P52,554 kon Master Teacher IV.

Sa sunod tuig, motaas pa ang sweldo sa mga magtutudlo kay ihatag ang katapusang tranche sa Salary Standardization Law nga gisugdan pagpatuman sa miaging administrasyon ug gipadayon sa administrasyon ni Presidente Rodrigo Duterte.

Sumala ni Umali padayon usab nagdawatan ang mga magtutudlo sa ilang allowances, bonuses ug incentive ug daghang mga reporma ang gipatuman sa DepEd ubos sa pagdumala ni Secretary Leonor Briones.

Gikan sa P2,500 sa 2017, karong 2018, P3,500 na ang chalk allowance sa mga magtutudlo,

Ang ilang clothing allowance gikan sa P5,000, giumentohan ngadto sa P6,000.

Gipahibawo ni Umali nga ang mga magtutudlo nagdawatan usab og mid year ug year end bonuses nga tukma sa usa ka buwan nga sweldo, P5,000 nga cash gift, P5,000 nga Productivity Enhancement Incentive ug Performance-Based Bonus alang sa mga trabahante sa DepEd nga mo-range gikan sa 50 hangtod sa 65 porsyento sa ilang sweldo, depende sa ilang performance isip magtutudlo ug tunghaan diin sila nagtudlo.