Makapahisukamod

Morag may pagkalihokan ug pagkakiat kitang mga Bisaya. Gani daghan kaayo kita og mga pulong nga nalambigit sa Kinatsila og sumbanan nga pulong: “tomba.” Adunay napandol, nadugmô, natapilok, nasadsad, nahugno, nadagma, ug uban pa. Matag pulong adunay bulok o detalye nga buot ipalutaw. Kon napandol gani adunay ali nga maoy nakapandol. Kon natapilok gumikan kini sa kahuyangan sa tiil. Mao nga kaniadto daghan kanato nagdako nga niwang kay kanunang galihok ug gisinggot. Karon? Ambot na lang.

Daghang matang sa pagkatomba ang gihisgotan sa ebanghelyo. Adunay tawo nga giyawaan. Natomba iyang dignidad. Apan aduna poy naghingilin o nagpahugno sa yawa pinaagi sa ngalan ni Jesus. Nadam-ag ang mga sumusunod ni Jesus kay ila kining gidid-an kay dili man siya sakop sa ilang pundok. May lain pa gayod nga pagkatomba nga gihisgotan: “Ug bisan kinsa nga makapahisukamod sa usa niining mga labing gamay nga nagatuo kanako, labing maayo pa kaniya nga higtan og usa ka dakong galingan nga bato likos sa iyang liog ug itambog siya ngadto sa dagat.”

Nagsunod ang duha ka panghitabo - ang tawo nga naghingilin sa demonyo ug ang bug-at nga pagtulon-an ni Jesus mahitungod sa pagdani sa “labing gamay” ngadto sa sala - kay may kalambigitan kini diha sa pulong nga “makapahisukamod”. Ang detalye nga gipalutaw sa maong pulong mao ang tawo nga natomba tungod kay adunay nagtukmod o nagdani. Binasi sa Mga Numero 11: 2529; Salmo 19; Santiago 5:1-6; Marcos 9:38-43, 45, 47-48 Mahimong pisikal nga tukmod o pagbutang og babag. Mahimo sad nga adunay gisulti o ideya nga maong nakapahisukamod. Suko si Jesus sa makapahisukamod sa uban ngadto sa sala: “Ug kon ang imong tiil makapahisukamod kanimo, putla kini! Labing maayo pa kanimo nga mosulod ngadto sa kinabuhi nga bakol kay sa adunay duha ka tiil nga itambog ngadto sa impiyerno.” Maayo pang dili tibuok basta malangit.

May laing templa sa pagkahisukamod diha sa libro sa mga Numero. Kini ang tawo nga buot iya-iyahon ang Espiritu sa Ginoo. Buot koralon ni Josua ang maong gahum sa Dios apan gibadlong siya ni Moises: “Maayo unta nga ihatag sa Ginoo ang iyang espiritu ngadto kanilang tanan.” Kaning pagpugong sa gasa sa Dios susama kini sa pagdumili sa pagpasaka sa uban sa dihang natomba sila.

Nahisulat sa libro sa mga Numero: “Umari kamo karon, kamong mga sapian, ug pagdangoyngoy kamo sa inyong umaabot nga kalisdanan.” Tungod kini sa pagduot nila sa ilang mga trabahante nga wala nila suweldohi ug pagpatay sa matarong nga tawo. Adunay natomba giduot hinuon og samot. Pagkawalay puangod.

Kining mga pulong nato nga naghisgot og pagkatomba, ato kining atbangan sa mga pulong mahitungod sa pag-isa: bangon, barog, tindog, ug uban pa. Magtinabangay kita ilabina taliwala sa daghang kalisod: katalagman, kamahal sa palaliton, ginadili nga droga, ug uban pa.

Kumusta ang atong pagkupot sa Dios nga mao ra gayoy makapabarog kanato?