Playoffs tuyo sa Panthers

Mga duwa karon: 1:00 pm- UV batok CITU (High school)

2:30 pm- CEC batok DBTC (High school) 4:00 pm- SWU batok USC (High School) 5:30 pm- USC batok USPF (College)

Seguradong luna sa playoffs ang tinguha sa University of Southern Philippines Foundation (USPF) Panthers sa ilang pagpakigbatok og balik sa University of San Carlos (USC) Warriors sa main game karong gabii sa Cebu Schools Athletic Foundation Inc. (CESAFI) college basketball sa Cebu Coliseum.

Ang Panthers ni Alan Cabatingan kasamtangang naglingkod sa ikaupat nga luna dala ang 5-4 nga rekord diin nagkinahanglan na lang sila og usa ka daog sa katapusan nilang tulo ka mga tahas sa double-round robin elimination aron makaabante sa playoffs.

Sa ilang bahin, ang Warriors naa sa ikalimang dapit bitbit ang 3-6 nga rekord.

Kon mapilde ang Warriors hayan mapupos na sa hingpit ang ilang paglaom nga makaabante sa sunod round.

Aron magpabiling buhi ang ilang paglaom, ang Warriors ni coach Bong Abad nagkinahanglang modaog sa katapusan nilang tulo ka mga tahas lakip na kining duwaa.

Sa premirong panagsangka sa duha ka mga kampo, ningsubay og grabe ka sikit nga kombati ang Panthers una nila napukan ang Warriors, 79-77, niadtong Septiyembre 2.

Gilaumang kulbahinam na sab kining ikaduhang panagsangka sa duha ka mga kampo.

Sa high school division, magsangka sa premirong duwa ang University of the Visayas (UV) Baby Green Lancers (50) batok Cebu Institute of Technology University (CITU) Wildcats (2-4).

Mosunod ang engkuwentro sa Cebu Eastern College (CEC) Dragons (2-3) batok Don Bosco Greywolves (0-6) dayon magsangka ang USC Baby Warriors (4-1) batok Southwestern University (SWU)-Phina Cobras (1-5).