PEÑALOSA VS. TUWA
Wala man tuod mosaad og knockout apan gipaneguro ni undefeated Dave Penalosa nga mahidugang sa iyang mga gipangbiktima ang Tanzanian nga si Twalib Tuwa sa ilang main event fight sa ESPN5 Boxing card nga sugdan karong udto sa SM Skydome sa Quezon City.
Sa press conference nga gipahigayon sa TV5 Media Center sa Mandulong City, giangkon ni Penalosa nga naghinamhinam man tuod siya sa maong away apan sa samang higayon nasinati usab niya ang gamayng pressure.
“Excited and pressured, but prepared for this fight,” padayag ni Penalosa.
Si Penalosa (13-0, 9KOs), kinsa lab-as pa sa iyang technical knockout nga kadaugan batok sa laing Tanzanian nga si Ricky Manufoe sa niaging Hulyo sa Bohol, nagtinguha nga masumpayan ang sunodsunod nga daog nga sa samang higayon maghatag kaniya og kahigayonan nga makaaway alag sa regional title sa sunod tuig.
Kini gikompirman ni kanhi world champion Gerry Penalosa kinsa kaabag sa ESPN sa maong promotion.
Gibutyag ni Gerry nga kon modaog ang iyang pag-umangkon batok ni Tuwa (21-5-2, 14Kos), ang kanhi featherweight champion sa Africa, hayag ang posibilidad nga iya kining paawayon alang sa regional title si Dave sa sayong bahin sunod tuig.
“We will definitely consult the boxing body, and we can have it on the first quarter of 2019,” matod sa two-time division world champion.
Ang ig-agaw ni Dave nga si Carlo Caesar Penalosa (12-1, 5KOs) mopakita usab og aksyon batok ni Jemsi Kibazange (11-2-2, 1 KO) alang sa bakanting WBA Asia South Flyweight championship.
Si Interim WBA Bantamweight World Champion Reymart Gaballo (19-0, 16 KOs) sa Sanman Boxing Gym makigsinukliay usab sa iyang kumo batok ni Julias Kisaware (296-1, 15KOs) sa non-title fight. Mobalik usab ibabaw sa ring si Marlon Tapales (30-2, 13 KOs) giparang usab ni Goodluck Mrema (22-3, 12 KOs).