PULIS GIPATAY

22 ANYOS 'GIBADLONG' DI MAG-DRUGS; KAMI ANG GISUKMAG: SUSPEK

Pulis namatay human giingong gitabangan pagdunggab sa amahan ug anak niadtong Dominggo sa gabii sa sityo Kulo, Barangay Pajac, dakbayan sa Lapu-Lapu.

Apan ang anak namahayag nga siya ra ang nidungggab patay sa pulis human sukmaga og makaduha ang iyang amahan.

Giila ni SP02 Romualdo Añana, Homicide investigator, ang biktima nga si P03 Alcistes Roxas, 41, sakop sa Aviation Security Unit (Avseu)7 samtang ang mga suspek mao sila si Domingo Lumonsod Jr., 44 ug anak nga si Angelito Malinao, 22, construction worker.

Giklaro ni Añana nga si Angelito nigamit sa apelyido sa iyang inahan ilabi na nga wa pa makasal ang iyang mga ginikanan.

Motibo sa pagpatay sa pulis gituohan nga gumikan sa dumot, kay giingong gibadlong si Malinao ni Roxas sa pag-undang na sa bisyo sa illegal drugs.

Matod sa kapuyo ni Roxas nga si Marlyn Tampus nga inay mopatuo si Malinao, gitabangan na hinuon niini sa pagdunggab ang pulis, kinsa nakaangkon og unom ka mga samad dinunggaban sa nagkadaiyang bahin sa iyang lawas.

Sa follow-up operation, nangasikop ang amahan ug anak.

Apan si Malinao, sa iyang bahin, nangatarungan nga gitawag siya ni Roxas, kinsa iyang gihulagway nga nag-inom niadtong tungora.

Sa iyang pagduo, kalit siyang gitamparos ug gidapog, dayon nihagit sa pagsumbong ni bisan kinsa kay iyang atubangon.

“Wa koy sala. Igo ra kong milabay kay gisugo kog chichiriya, gitamparos ko niya,” pulong ni Malinao nga gibalhug sa holding cell sa city police office.

Nisumbong si Malinao sa iyang amahan labot sa gihimo ni Roxas ug gi-adto ni Lumonsod ang pulis aron unta husayon.

Giingong gisukmag ni Roxas si Lumonsod bisan nga wa pa siya maka-komprontasi niini.

Wa makabantay si Roxas nga nagsunod si Malinao, nagbitbit nang daan og kutsilyo ug gikalitan sa pagdunggab sa makadaghan ang pulis.

Saysay ni Malinao nga nawala siya sa kaugalingon human iyang nakita nga gisumbag ang iyang amahan.

PULIS KNOCKOUT

Pulis na knockdown human gisukmag sa durugista niadtong Dominggo sa udto sa Sitio Mananga 2, Brgy. Tabunok,, dakbayan sa Talisay.

Si PO1 Melvin Medida natumba dihang naigo sa kinumo sa gikasinumbagay niyang durugista dihang mi-alarma sila sa dapit human dunay mga illegal nga kalihukan.

Gawas kang Medida, usa nila ka kaubang confidential marshal nasamdam sa ulo human gilabay og bato sa laing wala mailhing tawo.

Si Supt.Marlu Conag, hepe sa Talisay Police, nagkanayon nga dihang nadawat nila ang report kabahin sa mga tawo nga dunay ilegal nga kalihukan, niresponde gilayon sila.

Pag-abot nila, dunay mga tawo nga nagtapok ug sa pagduol, nanukmag kang Medida ang wa mailhing lalake.

Nahitabo ang ilang sinumbagay nga miresulta sa pagkahagba sa pulis.

Atol sa karambola, si Medida, nakabantay nga nibunot sa armas ang iyang gikasukmagay hinungdan nga iyang gipusil.

Gidali nila sa pagdala ang ilang confidential marshal sa Talisay City District Hospital.

Pagka-ala una sa hapon aduna’y mitawag nipahibalo nga may lawas nga napalgan.

Apan sa pagrespondi sa ka pulisan way patay sa dapit nga gituohan nila nga mao ang napusilan ni Medida. /