Korte pabor sa fixed nga sweldo

Di apektado ang mga bus operator sa Sugbo sa uwahing desisyon sa Supreme Court en banc nga niuyon sa naunang kamandoan sa gobiyerno sa paghatag og fixed nga sweldo ug dugang insentibo sa mga drayber ug conductors sa bus kon maayo ang performance.

Si Julie Flores, presidente Cebu Provincial Bus and Mini Bus Operators Cooperative (CPBMBOC), niingon nga dugay na sila nagpatuman sa tukma nga suhulan sa bus drivers ug conductors human gimando sa Department of Labor and Employment (Dole) ug Land Transportation Franchising and Regulator Board (LTFRB) niadtong 2012 pa lang.

“Dili naman na bag-o para namo kay gatuman naman mi ana

dugay ra. Amo nang gi-welcome, wala ta mo-oppose ana kay what is good for the drivers and conductors, among himuon,” pahayag niini dihang nahinabi sa Superbalita Cebu kagahapon.

Matod niya, ang maapektuhan sa kamandoan ang mga bus

company didto sa kaulohan. Si Flores, presidente usab sa Cebu South Mini Bus Operators Association (CSMBOA), niangkon hinuon nga ang mga operator og mini bus dinhi sa lalawigan sa Sugbo wala mohatag og fixed nga sweldo tungod kay dug-ol ra ang ilang biyahe itandi sa mga bus nga kasagaran tulo hangtod sa upat ka oras ang biyahe.

Sa 52 ka pahina nga desisyon sa Korte Supreme nga gisuwat ni Associate Justice Marvic Leonen ug gipagawas sa miaging semana, gidasonan niini ang kamandoan sa DOLE ug LTFRB sa mga bus operator nga hatagan og fixed nga sweldo ang mga drayber ug conductor inay komisyon.