5 ka mga sakyanan gidakop sa LTFRB, HPG
Lima ka gidudahan nga kolurom nga mga public utility vehicle nadakpan sa Task Force Kamao nga gilangkuban sa Land Transportation Franchising and Regulatory Board (LTFRB) VI, VII ug Highway Patrol Group (HPG) sa dakbayan sa Lapu-Lapu kagahapon.
Unang nadakpan sa grupo ni Regional Director Richard Osmeña ug Regional Director Ed Montealto ang tulo ka mga tourist van, sedan (TNVS) ug katapusan mao ang bus nga gipanag-iya sa Silverlines.
Atol sa pag-flagdown sa mga PUV, wa silay gipakita nga hustong mga dokumento aron pagpamatuod nga legal ang ilang pagpamasahero diin karga nila ang mga langyaw.
Ang usa ka van iyang sakay ang mga kawani sa ilado nga oil company.
Nilusad og joint operation ang LTFRB VI ug LTFRB VII uban sa HPG gumikan sa daghang mga report nga nadawat nga adunay mga PUV nga nagbiyahe nga way mga prangkisa.
Ang driver sa Silverlines walay gipakita nga dokumento bisan ang official receipt ug certificate of registration sa bus hinungdan nga giisyuhan sa LTFRB og Inspection Report Summon (IRS) kansang mga sakyanan tua na sa impounding area sa HPG.
Giklaro hinuon ni Montealto nga di pa hingpit mahukman nga kolurom ang lima ka PUV sanglit aduna pay hearing nga pagahimuon isip due process.
Kon mapamatud-an,, ang bus operator makamulta og P1 milyon, tag P200,000 ang van ug P125,000 ang Sedan.