Kapuy-an sa bakwit angay andamon na
Posibleng ihunong na karong semanaha ang search and retrieval operation sa mga biktima sa landslide sa Barangay Tina-an, siyudad sa Naga.
Si Provincial Diaster Risk Reduction and Management Office ( PDRRMO) head ug Incident Post Ground Commander Baltazar Tribunalo niingon nga posibleng anaa na sa grabeng pagkadugta ang mga wala pa nakit-an nga lawas ug di na usab kini maayo alang sa panlawas sa mga responder.
Kon di karong semahana, labing taas nga extention sa pagpadayon sa retrieval hangtod na lang usab sa sunod semana.
Nagpasalamat si Tribunalo sa tanan nga mga volunteer ug uniformed personnel nga
nitabang gikan pa sa pagsugod sa search and rescue operation dungan usab sa pagpangayo sa pagsabot sa mga tagtungod sa mga nakalas nga padayon pang gipangita.
Samtang, gitakdang ilusad na sa Kapitolyo ang Damage and Needs Assessment sa landslide area sa Naga, diin ang mga tinugyanan sa nagkadaiyang buhatan sa Provincial Government ang mohimo.
Ilang susihon ang kadaot nga namugna sa trahedya sa kabalayan, agrikultura, hayupan, panginabuhian, social
services ug uban pa. Si Tribunalo nagtinguha nga ma-pullout na sa mga evacuation center ang mga bakwit o apektadong mga residente ug ibalhin sila ngadto sa mga
temporary shelter alang usab sa ilang privacy ug mas hamugaway nga pagpuyo.
Isugyot ni Tribunalo kang Mayor Kristine Chiong nga magtukod og mga temporary
shelter samtang huwaton nga matukod ang 300 ka mga permanent shelter nga gisaad sa nasudnong kagamhanan.
Moabot sa 200-300 ka mga pamilya ang kinahanglang i-relocate gikan sa landslide area ug kasikbit niini nga mga dapit.
Matod ni Tribunalo, gikinahanglan ang hangtod 70% nga
delineation palibot sa quarry site aron di na kini maapektohan kon ugaling may moigo na usab nga landslide.