NPA NAGBANSAY OG SPARROW UNIT?
Susihon sa Police Regional Office (PRO) 7 adunay taga Sugbo sa giingong gatusan ka bag-ong recruits sa New Peoples Army (NPA) ang giingong nigraduwar sa pagbansay sa Samar himuong Sparrow Unit member.
Nakadawat og impormasyon ang intelligence unit sa kapulisan labot sa giingong paggraduwar sa gatusan ka mga sakop sa NPA sa lalawigan sa Samar niadtong Agusto 22 nga gihimo karon nga miyembro sa Sparrow Unit.
Ang sparrow unit maoy tiglikida sa grupo sa mga rebelde, matod pa, ang responsabli sa mga pagpanulong sa mga military detachment ug police station sa nanglabayng panahon.
Tungod niini, ang PRO 7 mopasubay karon pinaagi sa pagpakig-alayon sa tanang intelligence units sa gobiyerno sama sa armadong kusog sa nasud ug sa kapulisan sa rehiyon 8 kung kinsa ang maong personalidad.
Usa sa tan-awon ni Chief Supt. Debold Sinas, direktor sa PRO 7, bahin sa koneksiyon sa ilang monitoring tungod sa hulga nga pag-alsa sa mga walhong grupo batok sa gobiyerno nga gitawag sa militar nga 'Red October.' “We are not sure if kanang nag-graduate sa Samar naa bay taga Cebu or what I cannot confirm or deny ana because I am not privy sa ilaha were just coordinating so that we will be
prepared,” matod ni Sinas. Wala pa hinuon mo pagawas og kamandoan ang kampo Crame nga isaka nila ang
alert status gikan sa normal ngadto sa full alert nunot sa gitakdang kalihukan sa mga militanteng pundok.
Hinuon, usa ka semana sa dili pa ang Oktubre 15, modeklarar si Sinas sa full alert sa tibuok rehiyon 7 tungod sa tulo ka adlaw nga Asean Ministerial Meeting nga himuon sa Mactan Shangri-la Hotel and Resort sa Lapu-Lapu.
Aduna sab silay nadawat nga kasayuran nga molusad og halapad nga lihok protesta ang mga militanteng pundok ug labor groups sa Central Visayas. Gawas sa grupo sa mga mamumuo nga giingong gisakyan na sa militanteng pundok, lakip sa nasayran sa kapulisan mao ang mga tinun-an molusad usab og kalihokan.
Una nang nipahibawo ang armadong kusog sa nasud nga nakadawat silag kasaligang tinubdan nga ang mga rebelde, cause oriented groups ug ang oposisyon nagtinguha nga tumbahon ang pamunoan ni Presidente Rodrigo Duterte ning buwan sa Oktubre.
Apan kapulisan ug militar mipasalig nga padayon ang ilang suporta ngadto sa labing taas ug bugtong lider sa nasud nga mao si Presidente Duterte.