Public hearing sa Balacjoda alang sa pletihan sa jeepneys

Dunggon sa Land Transportation Franchising and Regulatory Board sa Central Visayas ang petition sa Basak-Lapu-Lapu City Jeepney Operators and Drivers Association (Balacjoda) nga nangayo og P2.50 nga provisional nga umento sa minimum nga pletihan sa

public utility jeepney (PUJ) karong Oktubre 15.

Usa sa mga rason sa Balacjoda sa pagpangayo og usbaw sa pletihan sa PUJ mao ang sunodsunod nga pagmahal sa presyo sa mga produktong petrulyo ug spare parts sa mga sakyanan.

Karong adlawa, mosaka na usab ang presyo sa diesel sa tag P1.35 matag litro, P1 sa matag litro sa gasolina ug P1.10 sa matag litro sa kerosene. Sa kasamtangan, P6.50 ang

minimum nga pletihan sa PUJ, P6 sa mga senior citizen ug estudyante ug kon uyonan ang petition sa Balacjoda, mahimong P9 ang pletihan sa unang lima ka kilometros.

Gipahibawo ni LTFRB 7 Director Eduardo Montealto nga magsugod ang public consultation sa ala 1 sa hapon sa ilang rehiyonal nga buhatan sa North Reclamation Area, siyudad sa Sugbo.

Matod niya, nagpadala na sila og imbitasyon sa National Economic and Development Authority (NEDA) ug Office of the Solicitor General aron motambong sa kalihokan diin madungog ang mga rason sa Balacjoda sa pagpangayo og provisional nga usbaw sa pletihan.

Sumala ni Montealto ang NEDA maoy mopahibawo kon panahon na ba ang pagpaumento sa pletihan pinaagi sa data nga ilang nahipos sa nangaging mga buwan.

Ang director nihangyo sa mga stakeholder sama sa mga senior citizen, mga estudyante, mga mamumuo,

consumer groups ug ubang pundok nga motambong sa

public hearing aron madungog usab ang ilang habig, kon mosupak o mouyon sa petition sa Balacjoda.

“Careful kaayo mi mo-decide ana. Kinahanglan balanse para walay moreklamo,” dugang ni Montealto sa pakighinabi sa Superbalita Cebu.

Si Metudio Belarmino, consultant sa Balacjoda ug tigpamaba sa Cebu Labor Coalition (Celac), nibutyag nga nagpadala na usab sila og pahibawo sa SolGen aron dili ma-technical sa pagpahigayon sa public hearing.