Konsehal Gica gipasakaan og kaso sa Ombudsman
Gipasakaan sa Office of the Ombudsman-Visayas si Dumanjug Councilor Erwin Gica og upat ka counts sa kasong kriminal ug administratiba gumikan sa giingong wala pagsang-at sa iyang Statement of Assets, Liabilities and Net worth (SALN).
Apan si Mayor Efren Guntrano “Gungun” Gica niklaro nga nakaduso sila og SALN sa iyang igsuon nga si Erwin sa mga tuig nga giingong wala sila makasang-at ug andam sila mopakita niini sa higayon patubagon na sila sa kaso.
“Naa mi copies, Ma’am. Amo lang pakita sa amo pagtubag sa kaso. Dili gihapon ka daug si Nelson. Sa election dili ka daug, sa kaso samot because it’s all fabricated cases,” tubag ni Efren pinaagi sa chat
messages sa Superbalita Cebu kagahapon.
Sa suwat nga pinetsahan og Agusto 10, 2018, si Alfred Yann Oguis, acting director sa Field Investigation Bureau nikompirmar kang kanhi Dumanjug Mayor Nelson Gamaliel Garcia, nga nahuman na ang fact-finding investigation sa kaso.
Matod niya, ang imbestigador sa kaso nga maoy nibarog isip nominal complainant, mao ang nipasaka og kaso batok ni Erwin.
Kini naglakip sa duha ka counts sa kalapasan sa Section 7 sa Republic Act 3019 kun Anti-Graft and Corrupt Practices Act ug sa Section 8 sa RA 6713 kun Code of Conduct and Ethical Standards for Public Officials and Employees ug kasong administratiba sa grave misconduct ug neglect of duty.
Sigon ni Oguis ang kaso ang ipaubos sa administrative adjudication
diin ang konsehal, hatagan og higayon nga madungog ang iyang habig ug makapresentar sa iyang mga ebidensiya.
Base sa records sa Ombudsman, si Efren ug Erwin ang wala moduso sa ilang SALN sa nangaging katuigan.
Kini nahibaw-an human si Garcia nihangyo sa Ombudsman og mga kopya sa mga SALN sa magsuong Gica sugod sa tuig 2013.
Sa tubag ni Sarah JO Vergara, officer-in-charge sa Central Records Management sa Office of the Ombudsman-Visayas niadtong Septiyembre 7, 2017, kini ni-certify nga way nakitang available nga SALN sa kang Mayor Gica sa 2013, 2014, 2015 ug 2016.
Samtang sa kang Konsehal Gica, 2013 lang ang nakita nga SALN. Tungod niini, nipasaka si Garcia og upat ka counts sa kalapasan sa Section 7 sa RA 3019 ug laing upat ka counts sa kalapasan sa Section 8 sa RA 6713 batok kang Efren.
Samtang tulo ka counts sa kalapasan sa Section 7 sa RA 3019 ug laing tulo ka counts sa kalapasan sa Section 8 sa RA 6713 batok ni Erwin.