Gilubong buhi isip tambal gihimo sa psychologist

Gilubong sa psychologist ang iyang pasyente atol sa therapy aron matagamtam niya nga siya buhi

Sa taho sa Mirror News nga si Andrey Zhelvetro mibutang sa iyang mga pasyente sa lungon una sila ilubong isip parte sa “psychological treatment”.

Kining lahi nga paagi sa pagtambal nasayran human ang mga tawo sa usa ka dapit nakadiskubre og 12 ka mga way sud nga lungon nga giabandonar sa lasang duol sa dakbayan sa Kiev, amahinan sa Ukraine.

Ang mga residente nitaho sa dinosena ang mga gipangkawot sa ilang dapit busa nanawag sila sa kapulisan.

Ang kapulisan misusi sa insidente ug ang ilang imbestigasyon nagtumbok kang Zhelvetro, kinsa gikataho nga miangkon nga ang mga lungon gigamit niya alang sa psychological treatment.

Matod ni Zhelvetro nga iyang gidala sa lasang ang iyang 12 ka mga pasyente ug gilubong nga buhi sud sa duha ka oras.

Ang video nga gikuha ni Zhelvetro ug gi-post sa online nga alang sa advertising nagpakita sa usa sa iyang mga pasyente nga nipaubos sa therapy.

Anaa sa video ang lungon nga bag-ohay lang gilubong unya adunay batan-ong lalake nga nagsul-ob og puti nga senina nga naghigda sa lungon una siya gilubong. Adunay tubo nga migawas sa lungon aron ang pasyente makaginhawa atol sa duha ka oras nga therapy.

Matod ni Zhelvetro nga ang iyang treatment gihimo niya pila na ka tuig ang nakalabay ug siya ang labing una nga nagpahigayon niini.

Usa sa mga pasyente nga gilubong buhi nisaysay nga dihang migawas na siya sa lungod nasinati niyang bag-o na siyang tawo.

Ang kapulisan nagtumbok nga way krimen nga nahimo. /