WA MAGPATAROG
“Dapat di nimo ikauwaw kon unsa ka. Dapat imong paninguhaon kon unsay gusto nimo makab-ot.” Mao ni ang gisulti ni Kent Mandawe, mapasigarbuhong person with disability o PWD ug karon miyembro sa Dragon Boat Team nga nisangka sa Hongkong ug nagdala og garbo sa nasud niadtong Abril ning tuiga.
Si Kent Tumangan Mandawe, 22, taga Zone 3 Housing sa Barangay Canduman, dakbayan sa Mandaue, graduating sa Computer Engineering sa senior high school sa Cebu Institute of Technology Enterprises (CITE) sa Barangay San Jose, dakbayan sa Sugbo.
Miyembro siya sa nakadaog nga Philippine Accessible Disability Services o PADS Adaptive Dragon Boat Team nga usa sa mga nirepresentar ug naghatag og garbo sa Pilipinas sa miaging Hongkong Dragon Boat Carnival sa Hongkong, China niadtong Abril ning tuiga.
Matod ni Kent, dili lalim ang iyang giagian sa kinabuhi sukad naputlan siya og usa ka bitiis human siya na-diagnose niadtong 2016 og osteosarcoma, usa ka matang sa cancer sa bukog.
“Na injured ko sa basketball nya wala dayon ko niadto sa hospital. Gipahilot ra nako pag-una kay abi namo’g simple ra nga injury kay makalakaw pa ko. Hangtod milabay ang pipila ka mga buwan nga nihubag na sya ug didto na namo napa check up sa doctor,” asoy ni Kent.
Apan dugang niya, uwahi na niadtong nadala siya sa tambalanan tungod kay nikatap na ang cancer cells sa iyang bitiis hinungdan nga gitambagan sila sa doctor nga ipaputol ang tuong bahin.
Naglisod siya og desisyon kon magpaputol sa bitiis ug gipangandoy na lamang niya nga kutluon ang iyang kinabuhi.
“Nihilak ko. Maorag di ko kadawat gani. Bahala na lang og mamatay ko kay sa magpaputol,” dugang niya.
Iyang giklaro nga nagtubo na daan ang maong tumor sa iyang tuhod sa wala pa siya nasamdan.
“Didto ra nadiscover pagkadisgrasya mura og nidali siya pagtubo.”
Gitug-an ni Kent nga nawadan siya og paglaum human una niyang makit-an nga usa na lang ang iyang bitiis pagkahuman sa operasyon.
Wa na gani siya ganahi mot- agad sa iyang mga ginikanan.
Apan bisan pa man sa giagian ni Kent, gipadayon niya ang iyang lakang sa kinabuhi ug nagpadayon sa pag-eskwela.
Matod ni Tatay Diony Tumangan, 47, amahan ni Kent, nga nalipay siya sa kaayuhan sa iyang anak.
“Nalipay ko kay nahug na nga ika duha na niya na nga kinabuhi ug gitagaan pa siya’g higayon,” si Tatay Diony niingon.
BISAN SA KALISOD
Taliwa sa ilang kalisod ug sa kahimtang sa iyang lawas, determinado si Kent nga motiwas sa pagtungha aron duna siyay mahuman kay pangandoy niyang maka-diploma.
“Ganahan ko maproud akong pamilya sa akoa.” Kent
Gitug-an usab ni ya sa Superbalita Cebu nga ang usa sa mga babag sa kinabuhi isip PWD mao ang pag commute.
“Lisod kaayu samot na nga wala’y priority lane, maglisod mi makig-ilog og jeep. Dugay kaayo mi makasakay, maayo na lang og naay maluoy namo,” asoy niya sa iyang kasinatian matag adlaw sa iyang pagtungha.
Matod niya, aduna’y mga tawo ang nagtuo nga dili na niya makaya ang iyang kahimtang apan misalig siya sa kaugalingon nga makaya niya kini.
Matod sa manghud ni Kent nga si Meryl Tumangan, 15, proud siya tungod sa giagian sa iyang maguwang.
“I am so proud, kay knowing nga naa siya’y disabilty ba kay iyaha ra na-conquer ang iyang giagian,” matod Meryl
“Everything happens for a reason jud kay sukad naputol ang iyang tiil, mas nidako ang iyang pagsalig sa Ginuo kay di na sya daling mo give up,” matod ni Meryl. /