Responsable sa tanan
Ang pag-ugmad sa yuta, sama sa pagmina ug uban pa, dili malikayan nga kabahin sa paglambo sa sosyodad. Uban sa pagtuyok sa ekonomiya ngadto sa unahan katugbang ang pagkaguba sa kinaiyahan. Kon dili responsable ang pag-ugmad sa usa ka dapit, tataw nga mosumbalik kini sa katawhan sa dili matagna nga panahon.
Usa sa ehemplo niini mao ang pagdahili sa dakong bukid sa Sityo Sindulan, dakbayan sa Naga niadtong Septiyembre 20 diin daghang kinabuhi ang nakalas. Dili halayo sa dapit ang quarry sa Apo Land and Quarry Corporation (ALQC) alang sa paghimo og semento ug ang sityo mismo nasakop sa ilang operasyon.
Human sa hitabo, ang isyu bahin sa dili responsable nga pagmina misibaw pag-ayo. Apan ang operasyon sa minahan ug planta sa semento, daghang nakatrabaho ug nangapo na sa kadugay sa kompaniya. Usa sa mga hinungdan nga ang kanhi nga lungsod sa Naga nahimo nang usa sa mga dakbayan sa lalawigan sa Sugbo.
Nagkainit ang isyu sa landslides sa Naga. Ang lokal nga kagamhanan ug mga opisyal sa hingtungdang mga ahensiya sa kagamhanan nahisama ni Ponso Pilato sa pagpanghunaw ug ni Hudas sa pagtudloay kinsay responsable nga manubag sa makaliluluoy nga hitabo.
Hangtod nigawas nga ang mga molupyo sa dapit mabasol sab human nagtabang sa mayor nga dili papahawaon sa ALQC?
Ug niangkas sa kainit sa sitwasyon ang environmentalist nga giingong mopasaka og binilyon ka pesos nga consolidated cases batok sa ALQC, CEMEX, Mines and Geosciences Bureau (MGB), Department of Environment and Natural Resources (DENR) ug kagamhanan sa dakbayan sa Naga.
Kinsay responsable? Seguro ang tanang nalambigit sa isyu, lakip sa environmentalist mangisog kon hinog nang panahon ug motunga taliwala sa kalibog. Leksiyon sa tanan. Manghinaut kita nga makabangon na ang mga biktima sa katagman.