Garcia ug Soco tandem?

Tinuod ba kining akong nadunggan nga posibleng mag-tandem na sab silang Kong. Gwen Garcia ug Glenn Soco alang sa Lalawigan sa Sugbo? Mao man gud kini ang giingong giduso ni Presidential Assistant for the Visayas Mike Dino isip sakop sa PDP-Laban.

Mao kini ang tandem nga giingong mobatok kanilang Gob. Junjun Davide ug Bise-Gobernador Agnes Magpale karong umaabot nga piliay sa Mayo 2019.

Naa lang kiniy usa ka dakong problema, sa pagkakaron. Gipaabot nga mosuki ang pipila ka mga kongresista sa lalawigan. Matod pa, mao kini sila si Kong. Red Durano, Jonas Cortes, Samsam Gullas, Peter John Calderon, ug Wilfredo Caminero.

Bisan pa man, nasiguro ko nga naa kang Garcia ang suporta nilang Kong. Benhur Salimbangon ug Kong. Aileen Radaza.

Dako usab nga tabang alang kang Kong. Garcia kini si Soco kay taga Mandaue man kini. Dako ang posibilidad nga paluyohan sa mga taga Mandaue kini si Soco.

Mosunod ba sab sa gusto ni PA Dino ang grupo sa mga mayor nga naa sa Cebu Movement for Federalism kun CemFed nga gipangulohan ni Mayor Aljun Diamante sa Tuburan.

Nakahibawo na man kita nga nagpaluyo ang mga Garcia sa kaatbang ni Diamante diha sa maong lungsod.

Sa laing bahin, di ba bakikaw sab alang sa CemFed, usa ka kalihokan alang sa pederalismo, nga mopaluyo kang Gob. Davide nga anak ni Chief Justice Jun Davide, usa sa mga lider nga anti-pederalismo?

Hinuon, laing konsiderasyon mao ang mga paksyon sa Kongreso nga nabahin sa kampo nilang Speaker Gloria Macapagal-Arroyo ug kanhi speaker Bebot Alvarez.

Di pa ko siguro kon asa nakasandig karon ang OPAV. Nibirig man gud kini kang Mayor Sara Duterte nga maoy nipaluyo kang Speaker Arroyo batok kang Alvarez.

Apan si Diamante suod gyud sa Hugpong ng Pagbabago kay pipila ka mga sakop sa core group ni Mayor Sara pirme man motambong sa mga kalihokan sa CemFed ug National Movement for Federalism (NamFed.)

Drug Test?

Drug test ba ang gikinahanglan ni kanhi mayor Mike Rama aron malimpyo ang iyang ngalan isip usa ka drug

lord protector? Hinuon, magamit kining maong drug test pag-usab sa pagtan-aw kaniya nga usa ka adik.

Bisan pa man, ang problema ni Rama mao ang pagngalan kaniya ni Presidente Rodrigo Duterte nga usa ka drug lord

protector ug apil kini sa listahan sa presidente.

Mao nga hangtod nga macleared si Rama isip usa ka

drug lord protector, bakikaw alang sa PDP-Laban nga makig-alayon sa Team Rama.

Tingale, gikinahanglan pa ang dugang magic ni Anabelle Rama ug iyang tropa sa sunod pagbalik ni Presidente Duterte sa Sugbo.