Nanghawod na sad ang mga Bisaya
Daghan nang mga singing competition nga gihimo ang GMA-7, sama sa Pinoy Pop Superstar, Protégé ug Pinoy Idol, pero first time ni karon nga taga-Cebu ang nikampiyon.
Ang dalagitang si Golden Cañedo nga taga-lungsod sa Minglanilla ang gideklarar nga labing unang kampiyon sa The Clash final showdown niadtong Dominggo.
Bisan sa artista search sa GMA nga Starstruck wa ko kabantay nga dunay taga-Cebu nga nidaug. Lupigon pirme sa text votes!
Reality bites but ang GMA di gyud ingon ana kakusog sa Visayas mao nang lupigon ang mga contestant sa Cebu pag-abot sa text votes.
Apan karon sa The Clash kay wa diay bearing ang text votes sa criteria o gamay ra? Mao kaha ni rason ngano nikampiyon na gyud ang taga-Cebu sa contest sa GMA?
Ah, mao na’y sakto. Ang desisyon sa judges mao gyuy mopatigbabaw. Dili tungod kay sa text vote.
GIRLIE LAPINID
Ang beteranang Cebuana singer nga si Girlie Lapinid mao sad ang nidaug sa “Tawag ng Tanghalan” sa It’s Showtime niadtong Sabado ug napildi pa gyud niya ang defending champion.
Si Lapinid unang nisikat niadtong `80s dihang siya’y nikampiyon sa Superwheel national singing competition sa Manila.
Sa kasaysayan sa Cebu Pop Music Festival, si Lapinid ang pinakadaghan og kanta nga na-interpret nga nahimong grand prize, maorag kaupat man tingali, diin ang una niadtong 1988 nga gi-composed ni anhing Mel Baclay (Bituon sa Pangandoy).
Tungod usab sa Cebu Pop iyang nahimamat ug nahimong bana ang anak ni anhing Cesar Las Piñas nga si Jun Las Piñas.
Ang pamilyang Las Piñas ang tag-iya sa Mutya Orchestra ug maoy orihinal nga nagduma niadto sa Cebu Pop gikan sa pagsugod niadtong 1981 hangtod 2004.
Well, win or lose, wa na tingali angayang pamatud-an pa ang Ms. Girlie Lapinid!
WRONG MOVE
Balik ta sa GMA, nganong gitangtang man sad to nila ang ilang variety show sa una nga SOP ug Party Pilipinas?
Karon nisamot na hinuon kalig-on ang ABS-CBN kay halos ang tanang pambatong singer sa Kapuso puros na namalhin sa Kapamilya-- Jaya, Ogie, Janno, Kyla, Jay-R, Jona ug karon Regine.
Karon ang GMA balik-variety show na sad sila. Maora silag nagsugod sa uno. Hahaay!
“PJ AND KIM”
Ako diay i-greet ang atong mga suki sa “PJ and Kim Barbershop” sa Poblacion sa Liloan. Pirme kuno sila mamasa og Superbalita. Hasta ang mga Lotto outlet sa Liloan ug Consolacion ato sad i-greet kay grabeng taasa pirme sa linya. Kay niabot na kuno sa P809 million ang Jackpot prize sa 6/58 Lotto. Haha…