Putlon TAMBAGI KO, NOY KULAS

Dear Noy Kulas,

Maayo adlaw kanimo. Tawga lang ko sa ngan nga Virgo, 39, single mother. Ang akong problema mahitungod sa amahan sa akong anak ug sa akong uyab nga foreigner. Gabuwag na mi sa amahan sa akong anak two years ago tungod sa among differences nga di ma-reconcile. Gawas pa, dunay time nga violent siya.

Dugay kong nakaanak mao nga 8 years old pa ang bata. Wa koy problema kay suportado sa akong live in ang bata. Giila siya sa among anak ug in fairness, pinangga ang among anak sa iyang pamilya. Minyo na siya ug duna nay anak sa iyang asawa.

Ako nakapag og foreigner nga andam mopakasal nako. One year na mi sa foreigner ug gusto na siyang magminyo mi. Pero ang akong ex di gusto nga magminyo ko og lain kay kon mamugos kuno ko, iyang putlon ang support para sa bata. Kining iyang support daku ni kay businessman siya ug naay properties ang iyang parents.

Mao na karon ang akong gikalibgan kon dayunon ba nako ang plano namo sa akong uyab? Mahimo diay nga undangon ang support sa amahan ngadto sa anak kon ang inahan magminyo og lain? Please tambagi ko. VIRGO

Dear Virgo,

Kon balaud ang hisgutan, wa man malatid nga ang kaminyuon sa inahan sa laing lalake makapahunong o makaputol sa suporta sa amahan ngadto sa bata kon iya ning giila legally. Mosugot man siya o di, iya ning obligasyon ang pagsuporta sa bata until maabot sa edad nga mahimo nang iyang putlon ang suporta. Gawas sa suporta, ang bata duna pay bahin sa katigayunan sa amahan. Mao na ang laing makuha sa bata.

Sa panahon nga iyang hunungon ang suporta, mahimong modangop ka sa korte aron mapugos siya sa pagbalik sa support, kana kon iyang tinud-on ang bahad nganha nimo. Samtang wa pa ni mahitabo, konsulta daan og abogado.

Sultihi usab ang imong uyab sa hulga ug sa posibleng epekto aron makapangandam usab siya kon magkinaunsa man ang sitwasyon. Mas maayo nang makahibawo siya ug maka appreciate sa imong sakripisyo.

NOY KULAS